تجربة بي ام دبليو 750 اي ال 2016
|
تجربة بي ام دبليو 750 اي ال 2016
السلام عليكم ورحمة الله وبركاته.. الله يحييكم اليوم معانا تجربة جداً روعة وجداً سيارة جميلة عروسة من أجمل مايمكن؛ معانا بي ام دبليو الـ 750 موديل 2016. طبعاً حابب أبتدي التجربة باعتذار كان لون السيارة أسود يلمع ماشاء الله الجو اليوم هواء مرة قوي وغبرة فمو بيدي يعني
--
740 من 475000 – 499 ألف ريال
126,666 – 133066 دولار
--
فالسيارة أسود فيراني أسود بني أسود رصاصي يعني كلكم نظر
--
750 من 599 ألف – 615 ألف ريال
159733 – 164 ألف دولار
--
والمعذرة منكم هذا واحد؛ اثنين خلينا نشرح لكم اليوم السيارة ذي كيف شركة بي ام دبليو عملت أشياء جداً روعة وأشياء جداً جميلة وفي نفس الوقت ماعملت شيء؛ السيارة ذي تخم من برا شيء ومن جوا شيء عارفين لما نقولكم من برا هالله هالله ومن جوا يعلم الله فعلاً بس بالمعنى الإيجابي جداً لو بنستخدم المثل ذا بمعنى إيجابي خلوكم معانا اليوم راح نشرح لكم أيش اللي صار في السيارة بشكل جداص رائع خلوكم معانا.
أبعاد السيارة الله يسلمكم كالآتي:
532, 190, 147 والوزن عندنا من 1920 لغاية 1477؛ المُحركات 730 إذا كانت تجي 6 سلندر أول سيارة تجي 4سلندر 20 توربو 250 حصان تقريباً نفس الشيء بس العزم علي طيب بصراحة السيارة بذا الحجم 4سلندر توِن توربو شيء جداً ممتاز خصوصاً العزم هو اللي يساعد السيارة لما تتحرك أكثر من الأحصنة.
عندنا 740 الـ 6سلندر توِن توربو وعندنا 8 سلندر تقريباً نفس المُحرك السابق الـ 4400 سي سي مع تحسينات بسيطة جداً هنا وهناك 450 حصان توِن توربو فالبارترين والجيربكس 8 سرعات تجي دفع خلفي تجي دفع رباعي وفي نفس الوقت للأسف ماهي موجودة كثير فيه أوبشن يجي أقل الطول أقصر حالياً غالبية الأسواق بيطلبوا الطول الأطول على أساس أنها بتعطي مساحة ركوب ورا رائعة جداً.
خلينا نتكلم الآن عن الأشياء اللي جداً حلوة وراح آخذكم شوية الآن نتكلم يعني بما أنه خلصنا التفاصيل حقت الطول والعرض والوزن والإرتفاع المعتادة خلينا نتكلم شوية دحين بنجي نتكلم أيش الإختلافات أيش اللي سوته بي ام دبليو جديد لأنه زي ماقلت الكلمة الأولانية ماسوت شيء؛ الشكل العام تحسينات جدا ًطفيفة من برا فماهي مالاقت يمكن عملية الإستحسان أو الإعجاب المفروض تحصل عليه السيارة دي مازالت مُتعة القيادة القصوى أو محركات المُتعة القصوى من أجمل مايمكن من أنعم مايمكن من أظرف وألطف مايمكن بصراحة السيارة من أمس أخذتها لليوم لأنه عندي زحمة مواعيد بس أخذتها في مكان جداً الوقت يعني زي مايقولوا قصير عشان أشرح لكم عليها بدون مايضايقهم في مواعيدهم مع عملائهم الوكيل ويعني مشكورين شركة محمد يوسف ناغي لكن بصراحة يمكن أفكر بخليهم بقولهم بلغوا على السيارة مسروقة ماراح ترجع لكم هههه من كثر ما أكذب بسوق سيارات كثير وعارف شوارع الحفر ومطبات بمشي بالسيارة ذي بنفس الحفر ومطبات بس بدون مابحس فعلاً فيه حفر ومطبات يعني بس الواحد شوية من باب المبالغة بيروح بيدور على الحفرة والمطب فين بيمشي من فوقها عشان يشوف كيف نعومة السيارة؛ راح نشرح لكم الآن على التعديلات والتغييرات والتحسينات اللي تمت على السيارة ذي بشكل جوهري وفيه أمكان محددة راح نشرح لكم عليها الآن.
أيش التعديلات اللي تمت في السيارة الله يسلمكم؟
زي ماقلت الشكل من الخارج أنعم وأجمل وأظرف وألطف بس ماكأنها عملت بي ام دبليو شيء اللي غاويين دبليو وحابين بي ام دبليو يعني ممكن يكونوا نوعا ما عندهم خيبة أمل طفيفة شوية كانوا متوقعين إعجاز تصميمي ثاني بس مافي لكن خلينا نتكلم من جوا التعديلات طبعاً ياجماعة الخير ماراح أتكلم عن مواصفات أمان يعني أعتقد بديهي جدا ًلما نتكلم عن مناطق عمياء وخروج عن المسار, رادار, مثبت سرعة ذكي يعني بصراحة عيب أتكلم في سيارات ألمانية أوروبية بالقمة يعني إحنا بنتكلم كأنه هم بيتميزوا بالسيفتي مابالكم على نوع ؛ فخلينا نتكلم على الأشياء الثانية اللي هي فعلاً مهمة مجموعة أشياء راح ألخص لكم هي:
1-عندنا لمبات الليزر الأمامية؛ هذي السيارة بدل 300 متر تحاول لـ 600 متر وبدون ماتجهر في عين الشخص اللي جاي في الخط المعاكس تلاقي اللمبة تتحرك أو تعدّل نفسها مع الحركة.
2- عندنا الهيدردسبلاي اللي هو الشاشة عرض معلومات الملاحة والسواقة كلها على القزاز؛ السيارات من أكبرهم في السوق إن ماكانت أكبر وحده فيهم.
3- عندنا عملية التحكم في الشاشة الداخلية باللمس بالأصباع بحركة الأصباع إن كان كذا أو كذا أو كذا زي ماشرحت لكم قبل كذا في المشاهدة السريعة على البي ام دبليو.
4- عندنا الكاربون فايبر بصراحة يعني إذا بي ام دبليو بتستخدم تستخدم كاربون فايبر ياجماعة الخير في سيارة بذا الحجم أيش خلّت للمبرغيني والفيراري بس هذي برضوا من ضمن يعني من الإعجاز العلمي والتقني اللي حاطينه في السيارة ذي.
5- فخامة ونعومة راح نسيبكم ماراح نتكلم عنها لأنها بديهية جداً عندنا حتى الإضاءات في السقف موجودة من جوا وصورتها لكم في الليل راح تبان معاكم.
6- عندنا المفتاح الذكي ياجماعة الخير الأوتو باركينغ المفتاح الذكي جداً باللمس تحرّك السيارة لقدام لورا توقف جداً رائع طبعاً يبغى له أوردر عشان مايجي مايتوفر في كل السيارات لازم طلبية.
7- التابليت الخلفية اللي ورا تتحكم فيها اللي هي تتحكم فيها أيش تبغى الستائر تتفتح تتقفل الكرسي الأمامي يتحرك التكييف تتحكم بالسيارة بالكامل كأنك تلعب Game ما بتتحكم في السيارة.
هذي بشكل عام الخمسة وستة وسبعة نقاطة دي اللي عاملينها شركة بي ام دبليو مميزة فالسيارة دي زي ماقلت لكم من جوا يعني اللي من برا مايستوعب يحسبها بي ام دبليو عادية طبعاً رجعوا تاني مرة للتعليق الهيدروليك أو الإلكتروني تعليق ضغط الهواء رجعوله فالسيارة جداً جداً ناعمة؛ خلوكم معانا اليوم راح ناخذكم كمان تكملت التجربة على السيارة ذي شرحت لكم برضوا على حكاية الفتحات شبك السيارة حقت الهواء الرديتر ينفتح ويتقفل إلكترونياً حسب الإحتياج لعملية التبريد والهواء فالكمبيوتر ييتحكم فيها؛ خلوكم معانا اليوم.
هذي الله يسلمكم اللمبات الليزر الحركة وزن أخف وعملية كمان تعطي طاقة أعلى بتعطي إضاءة أعلى وتستهلك طاقة أقل.
يعني حتى كمان طول الشاصية عملوه أطول بحوالي 5سم عن المرسيدس اس كلاس لما حبوا يتنافسوا معاها فزودوا طول السيارة 5سم, التكييف الخلفي, أكواب المويا والقهوة, عندنا التابليت زي ماوريتكم هو قبل كذا في الشرح حق يعني في السيارة هذي لما أعطيتكم عليها شرح بسيط, شوفوا نوعية الجلد حتى هذا مو الجلد العادي هذا جلد النابا.
مساحة جلوس كبيرة وافية وكافية تماماً بس سبحان الله سفر مشوار طويل أبغى أدلع نفسي عندي شغل أبغى أحط اللابتوب حقي قاعد ورا السيدة مثلاً قاعدة ورا السواق بيسوق اللي يكون فالواحد بده يمدد رجوله مشوار سفر طويل خليني أضغط على الزر هنا نشوف ايش يصير عشان الواحد أكرمكم الله يمدد رجوله مثلاً يحطها ويسافر مسافة طويلة يقعد يتدلع ورا يعيش يعني بالطول وبالعرض؛ عيب السيارة دي الله يسلمكم أنها تخلّي اللي مو والف على الدلع يتدلع ويخرب كمان فوقها من كثر الجمال والمواصفات اللي فيها الرائعة.
شنطة السيارة كهرباء كالمعتاد ونسيت أقول لكم الاستبنى رجعت هنا زي أيام زمان كفر كامل حجم كامل الأسبير ماهو الكفر الصغير؛ الشنطة يعني مع الإرتفاع الموجود هنا تكفينا أظن لغاية وحده شنطة حقت سفر كبيرة تدخل لجوا أو أكياس مقاضي كثير تدخل شايفين الشنطة بالكهرباء طبعاً كالمعتاد. طبعاً كلمة إكس درايف تعني دفع رباعي 8 سلندر جايه بقمة الفخامة ودفع رباعي طبعاً هذي ضربة واضحة أنه المرسيدس تطلبها لها أوردر الأسك أوبشن بس الآودي ال اي الكوارتروا فهنا يعني إذا ياجماعة الخير يا مرسيدس خذ الخبطة ذي وترى آودي إحنا زيكم وأحسن منكم كمان فمنافسة تعجبني أنا الألمان شديدة جداً ويا دوب يا دوب بحرف إكس أهو. مقاس الكفر 275/40,19 ماهو عشرين الظاهر حاولوا عشان يساعدوا في النعومة أكثر؛ هذا القلب النابض حق المُحرك 8سلندر 4400 سي سي تون توربو.
عندنا هنا الله يسلمكم محل مسند اليد انفتح وعندنا هنا الشاحن اللاسلكي حق الجوالات بس حالياً جوالات الجالكسي. جميع أجهزة الإنذار اللي حول السيارة 360درجة كلها موجودة عندنا هنا؛ هذي صرفية البنزين حقت السيارة. هذي أهم إختراع في السيارة أو إضافة للسيارة هي تحف فنية اللي هو المفتاح طبعاً نقدر نتحكم في السيارة لغاية 50 متر بعيد عنها؛ شوفوا معلومات السيارة كاملة تعطيك قراءات البنزين حتى كمان مثلاً متى تبغى السيارة تشتغل التكييف أو شيء قبل لا تنزل.
هذا الله يسلمكم الكاربون فايبر اللي قلت لكم السيارة معموله لتخفيف الوزن أهو علامة الكاربون فايبر محطوطة هنا على الأبواب ومن جوا تجي على ممرات الأبواب من هنا وفيه ممر حق الجيربكس من تحت لغاية ورا كلها مخففة بالكاربون فايبر. بتختلف الأسعار حسب الفئة وحسب المواصفاات بس ياريت كان فيها تبترونك هنا تحت التعشيق اللي هو باليد هذي وحده؛ الهيداب دسبلاي ما أقدر أشتكي لأنه ماشاء الله واحد من أكبر الموجودين في السوق حالياً حجماً واضح تماماً؛ عزم السيارة الأداء حقها ماشاء الله تبارك الله رائع حتى عملية لما نخرج من الخط يعني طالعوا هيا شوفوا دحين الدركسون الله يسلمكم الدركسون طبعاً موجود في سيارات تانيه يعني حتى بس نكون واضحين أنا مابقول لك بس تحس كأنك موظف لك ابن صغير بحيث أنه أيش كل ماتبغى تجي تخرج عن الخط حقك يرجعك تاني مرة؛ الجهاز يشتغل معاك يرجعك للخط لغاية سرعة 210 كيلو متر في الساعة.
الإلكترونيات الموجودة رائعة؛ السيارة تخليك بصراحة فعلاً تتحمس وتسوق السيارة يعني حتى من عملية التحكم في البودي تشوفوا السيارة بتميل البودي يميل معاك في الملفات هذي لا الكمبيوتر بيتحكم في تعليق الهيدروليك حق السيارة لدرجة لما تخش الملف بتخش بأكبر قدر ممكن من الثبات ومن أنه البودي مايميل بودي السيارة مايميل معاك وهذي بصراحة عبقرية برضوا يعني جداً يشكروا عليها. أرجوكم ملاحظة لو سمحتوا أحياناً أنا أكتب أشياء كتير في الفيديو دائماً بس لما تشوفها في الجوال ماتبان معاك لمن تشوفها من الكمبيوتر تلاقي الشرح موجود تحت منها الأسعار بالريال وبالدولار وأمور تانيه كتير فهذي ممكن يعني من الملاحظات المعذرة فيها منكم برضوا.
لأسعر بنتكلم عالـ 730 على حولها 367,000 الـ740 على الله يسلمكم زي مااقلت 730 بـ 367,000 هذي 58 حصان 4سلندر تون توربو 2000 سي سي واللي فيه عندنا الإكسلانس اللي هو الخط الفخم وفيه الخط الرياضي في الـ 740 الـ6سلندر و 323 حصان عندنا بـ 475,000 و 499,000 تقريباً والـ750 زائد الطريقة هذي بـ 599,000 اللي هو الإكسلانس والخط الفاخر بحوالي 610,000 ريال 450 حصان. وحده من الأشياء الحلوه اللي سووها في السيارة دي..... كويس إني كتبت الأسعار علشان ما أنساها؛ وحده من الأشياء الحلوة اللي سووها في السيارة دي الله يسلمكم الصيانة 5 سنين 100,000 كيلو زي ماهي من أول بس الضمان مددوه بدل 5 سنين 100,000 كيلو صار 5 سنين 200,000 كيلو زودوا الضمان 100,000 كيلو إضافية وهذا بصراحة شيء يعزز الثقة في سيارات بي ام دبليو بشكل جداً ممتازوكمان هم أعتقد بيضربوا في منافسينهم بطريقة جداً ذكية فأنه يقول لك لا إحنا سياراتنا تعيش وإحنا ضامنينها.
طبعا ًإيرباقات إيرباقات إيرباقات زي ماقلت أنا أيه عيب الواحد يتكلم في المواضيع ذي خلاص يعني السيارات هذي عندهم والأمان جدا ًبديهي لدرجة مابيتناقشوا ي حاجة زي كذا هذا عيب الواحد يتكلم فيها؛ إحنا نخدمك في كيف نخربك في الدلع وماالدلع زيادة أكتر وأكتر ونخليك تخس بالأيش يعني بفخر الصناعات الألمانية.
ماشاء الله تبارك الله يعني قطار منكلق بسرعة والفرامل ولا أروع ولا أروع الفرامل؛ 5ثواني فاصلة 9من 10 نتكلم عن ماشاء الله 2طن.
أوكي نسبة الإزعاج يا جماعة الخير الله يسلمكم 63,6. مميزات السيارة وعيوبها: مميزاتها بالأطنان يعني صدق وأمانة أتعب لما أقولك مميزاته مابقعد أقول مميزات كتير وهي فيها مميزات كتير جداً علشان لاتبان الكل دحين أيوا بتعمل دعاية وتعرف ماشاء الله عندنا شعب على طول يخش في الذمة وفي الضمير يعلم الغيب أيوا كم دفعوا لك.. الشاهد ما علينا في الكلام الهايف دا خلينا نتكلم كلام فعلي السيارة من أجمل وأروع مايمكن وواضح أنهم ضربوا تحت الحزام لجماعة مرسيدس لما يحطوا لك مرسيدس مثلاً يطلبها برضوا الـ4Draive هنا حاطين مواصفات الشاصية أطول من مرسيدس بحوالي 2 إنش يعني حوالي 5سم أطول فحاطين فيها. الآن الشكل الخارجي ما أنكر جميل جميل بس توقعنا الجمهور كله متوقع شيء يعني فيه شراسة بين دبليو ونعومتها القطة الشرسة دي تبان مخالبها أكتر فالآن هذي نقطة الشكل؛ الضمان قلنا ممتاز طولوا الضمان صار بدل 100,000 صار 5 سنين 200,000 كيلو ذا شيء ممتاز؛ الآن الصيانة 5 سنين 200,000 كيلو حلو؛ مو عاجبني تبترونك مافي المفروض يكون فيها؛ الأسعار نوعا ما طبعاً حسب المواصفات خلينا نتكلم بس بشكل عام الألماني كله غالي بس بتاخذ مقابلها أشياء تانيه كثير تاخذ أشياء أطنان للصبح سيفتي وثبات من أجمل مايمكن لكن ماينفي أنه السعر عائق مو أي أحد لازم تكون من طبقة معينة مادياً حتى تقدر تدخل في الفئة دي. الآن يمكن العيب الأساسي للسيارات هو دا الله يسلمكم عالأقل فيه عندنا في السعودية خصوصا ً أو يمكن دول الخليج بشكل عام بس السعودية خصوصاً عملية (الريسل فاليو) سعر إعادة البيع السيارة كل ماتزيد التكنولوجي فيها كتير ممكن أنها تكون عُرضة أنها تخرب أكتر وخصوصاً لما يجيك سواق غشيم وأنا دافع نص مليون وكيف خربت السيارة طيب ياعمي أنت سواقتك يعني كتير عليك حمار أعرج مو سيارة فلازم المُراعاة شوية فهمتوا علي كيف. عملية اللي يحبوا يلعبوا بالسبحة طول النهار يمين وشمال ويعملها مروحة الله يرضى عليك بعد عن الجهاز دا شوفوا أهو أنا بعمل كدا بيدي الجهاز بداء يلقط ويتحرك وراح يشتغل معايا فيعني التكنولوجي كتير يبغى لها مُراعاة برضوا لأنه غير كذا راح تكلفك وممكن بلاش حتى تكلفك لأن الصيانة مجانية ممكن تكون عُرضة لخرابات شوية أيش أكتر من غيرها.
ما أنتشرت السيارة دي أنا بظني الخاص الوكيل نوعاً ما أعتقد الوكيل نوعاً ما على قد مافيه اشياء واصفات حلوة بس أعتقد الناس يمكن كانت الشكل متوقعته بشكل أكتر والسعر كمان توقعت يكون شوي أقل إذا تكلمنا حول الفل أوبشن حوالي الـ600 – 700 ألف ريال فالجماعة يمكن أيش فيه أشياء كتير في الفئة هذي. السقف الخلفي قلت حسيتهم داخلين في منافسة مع جماعة روز رايس وفعلاً عاملين فيه إبداع رهيب في السيارة من أنعم مايمكن ومن أجمل مايمكن.
ختاماً.. زي ماقلت السيارة جداً جميلة وبتساعدك في كل شيء في السيفتي وبتشتغل معاك وبتشتغل بدالك اليوم شوية هواء ماكان مساعد في التصوير والغبرة لكن أتمنى قدرنا نعطيكم معلومات كاملة عن السيارة إن شاء الله التجارب الجاية كثير واتمنى السعر ينزل شوية علشان نقدر نشتريها بس غير كذا السيارة بصراحة جداً رائعة فنشوفكم على خير إن شاء الله.. مع السلامة.
هذي الفتحات حقت الرديتر عشان دحين ابتدأت الحرارة تعلى شوية فكانت مقفلة أول فيصير التحكم فيها علشان الإنسيابية والتبريد فتفتح أوتوماتيك أو تقفل أوتوماتيك؛ شوفوا الآن الفتحات مفتوحة كيف وهنا زي ما إحنا شافين الفتحات حقت الشبك قفلت إحنا طفينا السيارة فما بيحتاج بردت فالآن أهي رجعت قفلت مرة ثانية. هذي وضعية الأسبورت ماشاء الله شوفوا العدادات هنا والعداد هناك الآن خليني أغير إلى ضعية الكونفرت قيادة مُريحة نرجع تاني مرة هنا وهناك ونرجع تاني مرة على الوضعية الإقتصادية وتقلب العدادات هنا أزرق تاني مرة خليني أوريكم هي (سبور, كونفورت المريحة,الوضعية الإقتصادية) .
هذي داخلية السيارة ماشاء الله يعني الواحد قاعد جوت حفلة ديسكو ماشاء الله إضاءة رائعة في كل مكان في كل زاوية في كل وسط في كل زر يعني بصراحة الإضاءة أفخم من السينما اللي أدخلها في أغلى السينماءات في العالم من أجمل وأفخم كأني قاعد فعلاً في الطيران الإمارات ف يالدرجة الأولى والفيزا كلاس على أي طيارة عملاقة (18:16)؛ وحده من الأشياء اللي عاملينها هنا الإضاءة اللي في السقف هذي طبعاً بين الشركة الأم بي ام دبليو تملك روز رويز الظاهر حسوا لاشعور أنه فيه منافسة مع شركة روز رويز فهناك عندنا حبوا رسمة النجوم أو إضاءة النجوم والمجرات فهنا عاملينها بشكل جداً رائع وجداً جميل.
التقييم النهائي:
التصميم 9,5/10
الأمان 10/10
الأداء 9/10
صرفية البنزين 7,5/10
السعر 7,5/10
اجمالي النقاط 43/50
- يرجى تسجيل الدخول لإضافة تعليقات