تجربة فولكس واجن باسات 2015
|
تجربة فولكس واجن باسات 2015
السلام عليكم ورحمة الله وبركاته.. صباح الخير في يوم رمضاني عظيم كذا حلو الجو ماشاء الله الجو حلو والدنيا بدري كذا مافي أحد هذي ميزة رمضان في الصبح anyway اليوم جايب لكم بصراحة واحد يعني من الأبطال اللي شايفهم في البلد ما أخذوا حقهم كفاية ماهم معروفين كفاية وإن كان ماشاء الله حتى عالمياً إبتداء يشد حيله يشتغل في أشياء كثيرة جداً.
معانا فولكس واجن باسات.. أيش يعني كلمة باسات؟
كلمة باسات الله يسلمكم باللغة الألمانية الرياح التجارية أو ريح التجارة؛ الظاهر أيام زمان لما يكونوا يسافروا فكان ريح معين تخليهم يوصلوا للتجارة anyway اسمها trade wind ريح التجارة فراح نتكلم اليوم عن تفصيل السيارة دي أتكلمنا قبل كذا عن الكامري تكلمنا عن الأكوارد تكلمنا عن مازدا 6 أتكلمنا على سيارات كتير مرة زحمة في الفئة هذي فيه منها طبعاً زي 6 سلندر تخشوا على الإمبالا وتخشوا على الأفالون وتخشوا على 4 سلندر يعني بتلعبوا مع الجماعة الجماعة زحمة هنا فـ anyway اليوم منافسين السيارة دي الأكوارد؛ الكامري؛ الألتيما؛ والمازدا6 خليكم معانا اليوم وإن شاء الله كذا أيش تناسبكم التجربة. طبعاً الباسات هذي يعني أجيبها لكم بطريقة ثانية قبل ما أخش في المقاسات وفي الأبعاد؛ الباسات هذي الله يسلمكم إحنا نتكلم عن السيارة يعني استحملونا شوي في الوصف السيارة فئة السيارات المدمجة اللي بنتكلم عنهم اللي هم الكامري وأخواتها والطقة ذي الكاملة ودائماً كنت أقول لكم الفئة ذي من 4 سلندر 6 سلندر كل وحده فيهم مزحومة مزحومة بشكل أنه حصة الكيكة فيها الصانع اللي بيصنع حصة الكيكة فيها كبيرة يعني في اليوم الواحد يمكن يبيعوا 33 ألف سيارة مقارنة بسيارات ثانية فخمة وغالية السنة بطولها حتى يادوب يبيع بالرقم ذا فحصة عالمية كبيرة جداً كلنا بنحلم بفراري ولمبرغيني ومرسيدس وبي أم دبليو والسيارات الخارقة الجبارة ذي لكن في النهاية من جيبنا من كيسنا ماعندنا غير الفئة ذي
--
اسعار رمضان
79,641 S
SE 88,191
SEL 98,991
Sport 111,591
الدولار الأمريكي 3.57 ريال
--
فكثر الله خيرها شايلتنا ومستحملتنا ومستحملة أحلامنا وكل واحد يسوق السيارات هذي في فئة أنه بيحرق المكينة بيحسب نفسه راكب فيراري ومايكل شوماخر؛ المهم السيارة هذي الله يسلمكم عبارة عن سيارة أمريكية لأنها تصنيع أمريكا فهي السيارة أمريكية الكراسي أمريكية مريحة وواسعة من جوا الوسع الكبير بس أيش أعطى لك فيها أشياء الله يسلمك أعطاك فيها حاجة جداً مهمة أعطاك زي ماقلنا السيارة أمريكية بس بالفليفر بالنكهة الألمانية إن كان صلابة إن كان فرامل إن كان ثبات إن كان يعني السيفتي أيش حاب يحطها من الناحية دي فأعطاك هي وأعطاك هي بسعر منخفض جداً مقارنة بالفئة هذي يعني أغلى نوع فيها الآن حسب المواصفات الموجودة عند الوكيل أعلى نوع في عرض رمضان حوالي 112 ألف ريال وأقل نوع هم ثلاث درجات وأقل نوع أظن يبتدي فيي الـ 98,000 ريال تقريباً؛ وسيعة السيارة يعني أنا في الفئة دي جوة الزحمة دي مع أنه يمكن مقارنة ماهي عادلة اللي عندك الإمبالا 6سلندر وسيعة من ورا ودي في الـ 4سلندر وسيعة من ورا ماشاء الله يعني أنا قاعد ورا مستريح السيارات الثانية طبعاً كل شخص له طريقة فواحد يعطيك هنا شوية مثلاً مساحة الأكتاف أحسن مسافة الرأس أحسن مسافة الرجول في الكراسي الأمامية القدامنية تكون أحسن فكل شخص وله طريقة بس بصراحة إذا أحد يعني السيارة عائلية أو أحد حجمه كبير بيقعد ورا وهو مستريح على فئة 4سلندر جبارة السيارة دي. الشكرة دي أيش اللي سووها الله يسلمكم عشان يكسبوا السوق الأمريكي تعرفوا السوق الأمريكي عبارة عن قارة ماهو سوق يعني حاجة عملاقة فأيش يبغوا يسووا كانوا يجيبوا الباسات من ألمانيا ويودوها لهناك فلقيوها فيه طلب بس مُش هو ذاك الطلب فلقيوا طريقة الأسلم سووا زي ماسووا اليابانيين عملوا مصنع؛ اليابانيين كيف انتشرت الكامري أو الهوندا عملوا مصانع جوا أمريكا بالشكل دا طلعوا من حكاية حماية المنتجات وحكاية الضرائب العالية أعتبرها سيارات أمريكية وتصنع في أمريكا بعُمال أمريكيين بغض النظر عن الأصل ياباني أو المنتج ياباني؛ وفعلاً نفس الشي صارت السيارة تصنع في شتنوغا وفيتينسي والله يسلمكم ماشاء الله المصنع كلماله بيكبر الإنتاج حقتهم أو مصانعهم خلينا بالأصح بتكبر هناك وبتزيد عالمياً ومن ضمنها القارة الأمريكية.
هذا الموديل مقارنة باللي قبله زاد دفعة وحده في الطول 10 سم وفي العرض 1,5 سم 9سم من الـ 10سم دي تخيلوا في الطول الإجمالي جات من المحور الأمامي والمحور الخلفي بس الوسع دا كله عشان يعطيك ثبات ويعطيك راحة ويعطيك سيفتي ويخلّي السيارة أرسى ورمى لما يرمي الكفرات برا لقدام يعني عادة عشان يخلي السيارة أرسى أيش يسوي المحور الأمامي والمحور الخلفي يبعدوا عن بعض ووزن السيارة يتسقط في النص بالكامل فاكرين لما كنت بقول لكم المكينة كل ماتكون راجعة للمحور اللي ورا كل ماترسى السيارة أكتر ويصير توزيع الوزن ازبط من قدام وورا مع ملجوظة السيارة دي دفع أمامي خذوا بالكم ومع ذلك راسية جداً؛ النقطة الثانية غير أنه بيبعدوا المحاور الله يسلمكم الأربع كفرات هنا وهنا الأربع كفرات تطلع كمان بزوايا لبرا فتروح لبرا الكفرات شوية ولقدام فلاحظ أخذوا الكفر كل كفر من أربعة مثلاً أخذوا الكفر الأمامي أخذوه لقدام ولبرا اليسار اللي قدام لبرا الخلفي لورا لبرا بالشكل ذا وزن السيارة كله تسقط جوا صارت أوسع أرسى وبالرغم دفع أمامي أداء حق دفع خلفي بشكل ممتاز.
السيارة هذي الله يسلمكم كالآتي:
الطول: 486,6
العرض: 183
الارتفاع: 148 والارتفاع لابأس فيه أبداً
الوزن: يبتدي معانا من 1589 جيربكس دي إس جي 6 نمر الماكينة هنا طبعاً اللي بتجينا إحنا 5 سلندر 2500 سي سي 70حصان
العزم: 140 لـ 200 متر فعزم كافي على السيارة عائلية ماهي مقصود فيها الواحد يعني بيتسابق فيها لكن على قد أنها 4سلندر أو 5سلندر بنفس رياضي فبرضوا بتجمل؛ الفرامل الكفرات الجنوط الرساوة التعليق بشكل جداً رائع وحلو.
الكفرات ماشاء الله عندنا 235/45,18 كونتنينتل ألماني ماشاء الله يعني التشعيبات باينه حقت التقسيم مطر ماشاء الله البروز حق التوزيع المطر والمويا تدعس المداس حقت الكفر جبارة؛ الكيلبلات ممتاز؛ الهوبات ماشاء الله برضوا حجمها ممتاز مع التهوية جايه بس التهوية جايه بالطول ماهي جايه بالطول وبالعرض اللي هي كروس ديرل يعني.
هذا المُحرك حق الماكينة 5سلندر 2500 سي سي زي ما إحنا شايفين السيارة دفع أمامي والماكينة جايه لقدام فيه عندك وسع كبير جوا؛ الماكينة غالبية الماكينة جايه فوق المحور الأمامي ما أقدر أقول أنه والله وراه لا والله جايه فوقه لكن معوضينه شوية بالتراك العريض وأنها الرساوة حقت الألماني معروفة ماشاء الله يعني مايتخاف عليهم أبداً.
2500 سي سي بدل 4 سلندر 2400 عشان تعطي العزم والتورك العزم حق السيارة اللي أحسن من 170 طبعاً أنا كنت أتمنى 170حصان طبعاً أنا دحين راح أجيبكم عليها؛ فيه نقطة ثانية مهمة طبعاً ماشاء الله هنا الكبوت بمساعدات علشان لاتحرق يدك وأنت بترفعه كنت أتمنى العزم شوية يزيد أو الأحسن يزيد لأنه دائماً أنا أقول 170 حصان ألماني أحسن بكثير أحياناً من أحسن مثلاً غير 200 حصان غير من جنسيات مصنعين ثانيين ليه لأنه أكثر ناس أدق ناس في توصيل المعلومة الحصان يوصل على الأسفلت وفيه ناس طرق القياس كثيرة وراح أشرح لكم هي فهذول أدق ناس يوصلوا المعلومة حقتهم الأحصنة تكون واصلة على الأسفلت بشكل رائع وبشكل ممتاز الجماعة ذول الألمان والأوربيين عموماً والألمان خصوصاً.
هذي شنطة السيارة الله يسلمكم عندنا كاميرا خلفية هنا تحت و زر نضغط الزر تنفتح تطلع لفوق مافيش كهرباء بسرعة هي لوحدها بتتحرك المساعدات حقتها الزمور بيطلع؛ الكراسي الخلفية ممكن الله يسلمكم الكراسي الخلفية ممكن أنها تتطبق وفيه جداً حاجة حلوة ماشاء الله تبارك الله ماراح أقدر أقول هنا مسافة عالية كثير لكنها تكفي شنطة الواحد يرميها لو دخل لجوا ماشاء الله بتدخل لجوا مسافة طويلة يعني شوفوا هذي كذا أنا يادوب ألمس جوا غير الكراسي تتطبق ففيه وسع ماشاء الله لابأس فيه أبداً في الشنطة الخلفية وعندنا هنا الله يسلمكم اللي هو الكاميرا الخلفية موجودة عندنا هنا؛ حساسات خلفية مافي لكن فيه كاميرا خلفية وهذا مفتاح السيارة شوفوا علامة فولكس واجن فتح وتقفيل وشنطة.
حبيت الله يسلمكم أوريكم في الداخلي في السيارة هذي إن كان قدام وإلا ورا وزي مانتكلم دائماً أنه الألمان بيصمموا السيارة على 186سم فشوفوا ماشاء الله تبارك الله يعني أنا قاعد هنا وأنا قاعد كذا مستريح أهوء هذي يدي أنا مستريحة أبغى أرجع الكرسي كمان ورا لو فيه أحد أطول مني إرجع هذا آخر شيء لورا بحيث أنه السيارة قعدتي بالنسبة لطولي ماهي كويسة لأنه صارت مافي زاوية حقت أنه يدي لما تنثني زي ماشرحت لكم قبل كذا فماشاء الله حلوة؛ وعندنا هنا تحكم في الصوت فويس كمان عندنا نفيجيشن وعندنا الله يسلمكم كمبيوتر حقت السيارة يورينا معلومات السيارة كاملة اللي هي قبل كذا وريتكم هي الله يسلمكم في الجولف وفي كل سيارة حق اللي جربناها في الفولكس واجن؛ التلفون؛ عندنا عداد حرارة بنزين وسرعة و آر بي أم وزي ماحتشوفوا في زي ماشفتوا في حق التسارع؛ المبات إضاءة عندنا أتوماتيك أو عادي؛ أدراج هنا موجودة عندنا؛ تحكم في الدركسون لفوق وتحت ولجوا وبرا وهذا الشيء ممتاز مو كل السيارات بتقدم لجوا وبرا فيه كثير يادوب فوق وتحت وإن كان يدوي برضوا بس عملية يمكن التوفير في السعر شوية يكون تنافسي بس أنا اللي بتكلم عنه ماشاء الله تبارك الله المساحة جوا وقدام وورا للأكتاف للظهر للسقف لفوق يعني حتى هنا ماشاء الله فيه خمسة أصابيع فوق أنا عادة أخلّي أربعة ثلاثة أصابيع هنا فيه خمسة ماشاء الله.
زي ماقلت الأبواب تنفتح بزاوية عريضة تقريباً حادة شوية الزاوية كأنها 90 ليسهل عملية الدخول والخروج؛ الآن الله يسلمكم أهوء ماشاء الله يعني هذا أولها فيه خمسة أصابيع بين ركبتي وبين رجلي وبين خمسة أصابيع ماهو أصباع وإلا اثنين وإلا ثلاثة خمسة أصابيع عشان كذا بقولكم السيارة دي والأمبالا معجب فيها جداً في مساحة الجلوس الخلفية جبارة.
فيه عندنا فتحات تبريد مكيف هنا الكراسي مريحة جايه مخمل قطيفة مخمل كمان في نفس الوقت جلد نص ونص؛ مسند يد خلفي موجود عندنا هنا؛ حلاوة الكراسي أنه جاي بوضعية ظهر شوية بزاوية ليش عشان مثلاً واحد حجمه كبير وفي رحلة طويلة بدال ماهو قاعد متصلب طول الطريق كذا مسندة الراس تطلع وتنزل لورا كل اللي يسويه يا إما يرجع راسه لورا يريح أو سحب نفسه أكرمكم الله شوية نازل لتحت كذا خلاص قاعد أنا مستريح ممكن أمدد رجولي كمان زيادة وأحط راسي وأنام في مسافة طويلة وأنا مستريح في سيارة زي هذي من أجمل مايمكن حتى مسند اليد هنا بيريحك ومسند اليد من هنا فتلاقي نفسك مكانك ورابط الحزام ماراح تطير لا يمين ولا شمال.
مساحة السقف ماشاء الله شوية فيه وأنا لابس الكاب فيه خمسة أصابيع ثانية هذي كمان المساحة الموجودة بالسقف؛ أعتقد للسيارة العائلية أو لسيارة أحد مثلاً حجمه كبير قاعد ورا أوكي خصوصاً اللي حابب ياخذ سيارة بنكهة ألمانية يبغى سوية الرساوة والفرامل والسيفتي والإيرباقات والأشياء ذي كلها.
السلام عليكم ورحمة الله وبركاته وبسم الله الرحم الرحيم وبالله نستعين.. هذي 160 كيلو في منتهى البساطة يعني أنا بشد على الفرامل بالمرة وشوفوا ماشاء الله تبارك الله يعني وقفة السيارة يعني حتى أقرص على الفرامل أكتر من كذا بس حبينا نجرب على خفيف كيف الفرمل.
الآن الله يسلمكم أيش الخلاصة حقت السيارة دي أيش الخلاصة حقت السيارة دي؛ عشان صوت التكييف لا يأثر شوية الخلاصة حقت السيارة هذي كالآتي:
شرحنا لكم هي السيارة عائلية مريحة؛ واسعة فيها يعني أختصر لكم هي بالوصف دا السيارة أمريكية مريحة بسعر ياباني بجودة ألمانية هذي الفورة اللي حبوا يوصلوا لنا هي؛ النقص حاجة يمكن بسيطة كمناطق عمياء أعتقد هذي من طلبات الوكيل للأسف ماهي موجودة؛ شوية أحسنة إضافية طبعاً هو عوضوا زي ماقلت الـ 5سلندر بدل 4 بالنسبة لمنافسات من 4سلندر ( الألتيما- الأكوراد- المازدا6- الكامري) دخلت كمان على الكوري السوناتا والأبتم أظنها أو الأقل منها الـ 4سلندر وإن دخلت الله يسلمك كمان على أيش يقولوا على الأمريكي على المالم والكروز وغيرها ترى السيارة صدق أمانة أنا أقدر جداً يمكن فيه ناس تختلف معاي في رأيي أنا أقدر جداً أول شيء السلامة السلامة الموجودة كاملة في السيارة بشكل مريح للسيارة لحفظ حياة السائق لاسمح الله في حالة الإكسترينغ كتسيز في حالات اللي هي المناورات الصعبة الخطيرة اللي أنت مُش داخل حلبة سباق بس الشوارع الواحد بيشوف أشياء يمكن مابيشوفها في حياته في حلبة سباق وإلا في أي حتة تانية فلو حصل في ظرف يعني وتبفى تلحق تتجاوب السيارة ماشاء الله تبارك الله بتتجاوب معاك بشكل ممتاز. أتمنى أتمنى يزيد إنتشار الوكيل حتى لو شبكة موزعين أتمنى كمان لو قطع الغيار تزيد من أنتشارها أكتر حتى عن طريق شبكة موزعين لأنه أتوقع للسيارة دي مستقبل باهر جداً بس فيه شغل كتير دحين كمان بوجود المصنع الشركة الأم موجودة لكن أتمنى أنه دائماً يتم دعم البنية الأساسية اللي هي عن طريق نشر قطع غيار والله يسلمكم عن طريق الوكيل يعني يكونوا شبكة موزعين مو ضروري هو يفتح في كل مكان التكاليف عالية جداً ولكن لو مرنوا ميكانيكيين وموزعين منتشرين في أماكن تانيه أنا أعرف الشعب نص راسه ثقافة الكامري والسوناتا كمان تشوفوا حقانيين كمان خلاص فيه يعني إدمان يعني إدمان ما حتى لو بتفتح له عينه على شيء تاني البعض يتقبل لكن الغالبية لا هالله هالله خلاص الكامري هي كامري أنتهينا يعني عرفناها خلاص هذي صاحبتنا من زمان طيب باقي السيارات التانية لا لا هذي جاية من الجنة الكامري الباقي كله جاي من جهننم مُش إساءة للسيارة ياجماعة الخير أنا مابسيء للسيارة عشان لايتفهم كلامي غلط ويتم تهويله بأشكال والوان وأنا عارف فيه ناس بتدور على الكلمة الطيبة علشان تقلبها غلط عشان يفهمها غلط لأنه حابب يفهمها غلط أنا بتكلم على ثقافة شعب أنا مابعيب في سيارة فأتمنى زي ماقلت من شوية بس شوية الأمور هذي أن السيارة تكبر أتمنى أنكم بس أنه ياجماعة الخير فتح عينك وأعطي نفسك فرصة روح شوف السوق سوق السيارات في السوق صفي دماغك من كلام ينفع وماتنفع ويقولون ويعيدون وحطوا ورفعوا ونزلوا صفي دماغك أنسى كل كلام الناس وروح سوق انت جرب فيه التجارب فيه والسواقة فيه ويعني أستفتي قلبك ولا يفتوك فأنت سوق بنفسك وشوف شوف حقت الصيانة والأمور هذي كلها أن لقيت ماناسبك خش على قطع الغيار أسألهم بكم قطع الغيار بكم التكاليف هذي البودي ما أكذب عليكم ياجماعة الخير أنا بالنسبة لي يمكن ما أدور على كم اللمبة تكلف وإلا كم الشبك يكلف لأنه السيارة عليها بإذن الله تأمين والشر برا وبعيد التأمين له حل بس أنا بتكلم الله يسلمكم عالقطعة اللي أنا راح أدفعها من جيبي هذي هي المهمة.
فختاماً.. أتمنى تكون تجربة إن شاء الله تكون ناسبتكم وآسف إذا طولت عليكم ولي تجارب تانيه كتير وشكراً لكم. هذي داخلية السيارة الله يسلمكم والأنورا مطفية أهيء يادوب عندنا بعض الأزارير والأشياء اللي هي مثلاً أيش فيها إضاءة خفيفة؛ الآن خل نشغل الإضاءة هذا الله يسلمكم العدادت نورت هنا بالكامل أكرمكم الله الأرضية نورت بالكامل باقي الأزارير كلها اللي في الأبواب بالكامل أتنورت معانا؛ الطبلون هنا واللمبات كامل هنا فوق هناك ثانية مرة تحت؛ الأبواب هنا وختاماً هنا فوق شوفوا ماشاء الله النور لما بيشع من هنا النور أحمر بيشع من فوق لتحت بتلاحظوا حتى هنا بيعطي شوية إنعكاس.
شكراً لمتابعتكم
- يرجى تسجيل الدخول لإضافة تعليقات