تجربة فولكس واجن جيتا 2016
|
تجربة فولكس واجن جيتا 2016
السلام عليكم ورحمة الله وبركاته.. اليوم معانا السيارة من فئة السيارات الإقتصادية والعملية؛ السيارة ألمانية بتتنافس مع كوريين ويابانيين وخصوصاً يعني وأمريكان في الفئة هذي اليابانيين كانوا مسيطرين فترة كبيرة اليابانيين والأمريكان دخلوا حرب كبيرة في المنطقة ذي اليابانيين سيطروا والكوريين الآن يعني تقريباً مو مخلّين على قلبهم أحد
--
السعر من: 75 – 97 ألف ريال
20 – 25,866 ألف دولار
--
عادمين السوق بالكامل داخلين بشكل قوي والمواصفات مرة حلوة؛ فيه عندنا هنا صانع ألماني فلسفة ألمانية مختلفة أنا دائماً أقول السيارات يا جماعة الخير كل واحد يقدّم للجمهور حقه حسب فلسفته زي الشيف في المطابخ الكبيرة تلاقي كل واحد يقدّم لك السيارة أو الطبق حقه بمفهومه هو بثقافته هو فمثلاً واحد يعطي لك السكر زايد شوي الثاني لا والله يعطيك الشطة زايدة شوية أو الملح زايد شوي كل صانع فيهم ممتاز له زبائنه وبيغري العُملاء بحاجة ثانية. طبعاً الألمان دائماً بيركزا على الثبات سرعة أداء فخليكم معانا اليوم نعطيكم معلومات السيارة بشكل إن شاء الله كذا يكون يكفيكم ويكون واضح للكل.
السيارة هذي الله يسلمكم لمين؟
السيارة هذي المقصود فيها اللي حابب يشتري فولكس واجين جولف بس يبغاها بشنطة هذي هي السيارة السيارة منافسة السيارة عملية الاسم فولكس واجين السيفتي حقتها الألمانية الثبات والأداء وفي نفس الوقت سيارة الشعب بس أنها بالمستوى الألماني.
الآن في نفس الوقت اللي بنتكلم فيه الله يسلمكم على السيارة مين منافسينها؟ عندنا الآلي أنترا عندنا التيدا عندنا الهوندا سيفيك عندنا الكورلا هذول منافسين السيارة الفئة ذي بس هنا زي ماقلت جايه بالمفهوم الألماني بالسيفتي الألماني بيركزوا أكثر على حكاية الثبات – رساوة – فرامل – أداء- وأمور زي هذي وصلابة البودي أكثر.
الآن أبعاد السيارة الله يسلمكم:
4640 – 1453 – 1778 والوزن على حوالي 1395 كيلو
طبعاً فيه محركات برا تجي كثير:
1800 سي سي توربو 2000 فيه ألفين توربو وفيه 500 بس عندنا في السعودية الـ 2000 سي سي
2 لتر عادية تنفس عادي بدون توربو
6 سرعات
الدفع أمامي؛ وزي مابقولكم فولكس واجن بس للي يبغاها بشنطة ماهي هاتش باك عائلية أكثر هذي هي السيارة.
الآن الله يسلمكم لو قسنا مقاس الكفر 225 /45,17 جايه الجنوط كلها مفتوحة عشان عملية تبريد الفرامل؛ زي ماقلت هذي السيارة سيدان الفئة حقت اللي تكون نوعاً ما السعرية مقبولة.
السعر يبتدي من 75 ألف لغاية 97 ألف تقريباً يعني فيه كسور صغيرة هنا وهناك بس أنا بعطيكم السعر من الأول.
الآن السعر 75 ألف ممكن مثلاً بيحطها مع السيارات في أعلى منها فيمكن السعر نوعاً ما ماهو مساعد السيارة بكثير شوية ماننكر فيه صلابة في ثبات فيه أداء فيه الأمور هذي كلها اللي بيروح يشتريها سيارة أوروبية عارفه نفسه ممكن يدفع ضريبة شوية أعلى مقابل أشياء ثانية كثير لمن يسوق السيارة الواحد يعرفها تمام؛ الآن الكوري يمكن بيركز أكثر على عملية الأنوار والدلع والأشياء الحلوة والتباتيك الصغيرة هنا وهناك وكل شيء ينور في السيارة والشاشات نافيجيشن وووو هنا الألمان يمكن لا فيهم يعني مقابل السعر كنت ما أنكر يعني أنا كنت أقول أتمنى مقابل السعر ذا مثلاً لو كنا ناخذ سيارة تكون المُحرك توربو 200 حصان فهمتوا عليا كيف بدل ماتكون أنه المحرك 2000 سي سي التنفس الطبيعي؛ صرفية البنزين ماهي مرة ممتازة كثير وراح أشرحها أوريكم هي فيعني كنت أتمنى برضوا أن صرفية النزين تكون أحسن شوية لكن مقابل الكوريين واليابانيين اللي جاي للسيارة دي مخصوص لأنه حابب ياخذ سيارة ألمانية بالصلابة الألمانية طبعاً الحساب زي ماقلت راح يدفع أكثر؛ اللي يبغى أشياء تنور أكثر ودلع راح يروح على الكوري الكوري بيثبت نفسه كلماله بيتطور بيطلع أشياء ممتازة؛ اللي والف على الاسم الياباني قديم خلاص ومعروف وقطع الغيار وعملي وووو ألخ ألخ ومع أنه كل السيارات عملية مابقول أنه وحده فيهم ماهي عملية لا بس السمعة قد أيش فيه سيارة 70 سنة أثبتت نفسها على مر الأجيال وفيه سيارات لا لسى جديدة وفيه سيارات اسم قديم بس لا ماكانت موجودة في المنطقة وشادين حيلهم أكثر بيدخلوا كل المنتجات.
أتمنى من على الجهة اللي أنتجتها فعلاً أنا السيارة شايفها ممتازة بس أتمنى عملية الدعم من المصنع شوي كناحية سعرية أنها تخلي السيارة مقبولة أكثر ومرغوبة أكثر عشان الناس يعرفوا يعني أيش سيارة أوروبية أكثر إن كان في قطع الغيار الصيانة أو إن كان في سعر السيارة الأساسي؛ أتمنى هذا الدعم أعتقد لو جاء للوكلاء في الشرق الأوسط راح يساعد السيارة ذي كثير أنها تنتشر وتاخذ حصة حصة في السوق مكان التأمين.
الآن جمالاً فولكس واجن ماهي مرّة يعني تركز حكاية أنه السيارة مرّة حلوة وكل شيء دلع ومنور فيها لا ممكن يركزوا على حكاية الصلابة الصرامة فيها أكثر حتى شوف التجهيزات بلاستيك ولفنا نشوف البلاستيك عفواً البلاستيك اللي هو كروم أو البلاستيك الخشب اللي تشوفوه في السيارات كثير اووووه خشب وصلة خشب هو بلاستيك شكله زي الكروم أو حديد أو ستانلستيل أو خشب هنا موجود بنفسها بس لا فعلاً تحس النوعية هنا دائماً أسمك أو أجود يعني حتى لما تخبط على الهذا ماتسمع صوت مجوف دائماً كثير لا تحس أنه فيها جودة لكن هل فيها الأشياء اللي تفتح النفس مرّة مرّة كثير مو بالضرورة لكن أنت عارف متطمن إنك آخذ سيارة فرامل ثبات قساوة لاسمح الله حوادث السيارة تخدم وتعيش والسيارة أيه من الصانع الألماني الكبير.. خلوكم معانا.
هذا الله يسلمكم المُحرك القلب النابض:
115 حصان 2000 سي سي
العزم 170 / 100 متر
6 سرعات
أوتوماتيك
دفع أمامي للسيارة.
وحده من الأشياء برضوا يمكن هنا أنا دائماً أعلق عليها فهي الله يسلمكم عملية أنه ياريت فيه مساعد ايام الصيف الحارة الواحد لما يفتح الكبوت يلاقي الماكينة مولعة نار مابيحرق أصابيعه ياليت فيها مساعد.
أنا الله يسلمكم قاعد في الخلف فيه عندي تقريباً أبو صباع صباعين ورا في السقف عندي كمان فيه عندي ثلاثة أصابيع ثانية مع السقف قاعد ورا وضعية الجلوس لا بأس بها فتحات التبريد التكييف الخلفية موجودة هنا سماعات الحلو في السيارة ذي لو بنتكلم أنه السيارة أوروبية أنه نوعاً ما يكون سعرها غالي 8 إيرباقات فتح كلام 8 إيرباقات في السيارة وهذا اللي أنا دائماً أحترمه في السيارات الأوروبية حياة البشر عندهم جداً مهمة 8 إيرباقات في سيارة زي هذي الآن ممكن المنافسين يتفوقوا عليها في الإكسسوارات والدلع وحاجات زي كذا بس لما نتكلم ثاني مرّة على ثبات على رساوة على فرامل على سيفتي على إيرباقات السيارة ممتازة.
هنا لما نفتح الشنطة مافي الفزلكة الزايدة أو مواصفات زيادة مافي شيء كهرباء بس اللهم أنت تفتح تلاقي السيارة هي وحدها مساعدات حقتها تنط لفوق والقفل يدوي مافي كاميرا خلفية فيه حساسات رجوع لورا طبعاً فيه أوبشنز أكثر بس السعر بيختلف حسب المواصفات لكن الفئة ذي اللي في يدنا قدموها.
من الأشياء اللي شوية لاحظتها في السيارة ذي كجودة إيرباقات 8 كراسي جلد أشياء كثير حلوة في السيارة أحسه فيه أشياء بسيطة جداً ناقصة ممكن تجمل السيارة يعني شكل السيارة ما اعرف كيف أجيبها عارف لما يجي واحد شكله عادي جداً كذا بس لما تكلمه وإلا تقعد معاه تلاقي روحه مرة حلوة وأخلاقه مرة حلوة وممتاز ومو باين في وسط الزحمة هذي عيب السيارة أنها ماهي باينة في وسط الزحمة كثيرمنافسينها ممكن عاملين سيارات شكلها أجمل أو عندهم الاسم يعني خلوا بالكم الاسم في منطقتنا معروف من أول ويعني تصدقوا حاجة بسيطة يمكن ملاحظة هايفة صغيرة لو فيه بس كشاف تحت هنا صغير وأنا عارف أيش الأوبشن جناح خلفي صغير حاجة كذا إكسسورات بسيطة على السيارة ترى راح تخلي شكلها يختلف كثير عن مقارنة.....
زي ماقلت فولكس فاجن جولف 4 أبواب 8 إيرباقات – سماعات ماشاء الله ساوند سيستم بكل مكان عندك فتحة سقف نوعية الجلد لا بأس فيها مع أني ياريتها كانت مخرمة شوية راح يطلع شيء جداً ممتاز.
زي ماقلت الله يسلمكم مافي نافيجيشن مافي كاميرا خلفية لكن فيها بلوتوث وفيها جي بي مثلاً أنت تجيب يعني إن كان الموسيقى حقتك أو أي شيء حابب تسمعه بنفسك في السيارة؛ عندنا بلوتوث عشان تشوف جوالك عليه وفيه تحكم من الدركسون هنا إذذا حابب أي شيء تحكم إضافي موجود عندك حتى في التلفون أو في غيره.
أيش معنى كلمة جيتا؟
كلمة جيتا الله يسلمكم ليها أكثر من معنى لقيتها بمعنى اسم بنت تجي جيتا وتجي كمان من كلمة الله يسلمكم الريح فنوع من الرياح اسمه جيتا أو الريح جيتا فاهم جايه من أنها خفيفة وسريعة أو بنوتة دلوعة.
الآن السيارة بصراحة تصنيع مكسي فيها مواصفات جداً ممتازة حاب أوضح أنه الصانع الألماني حاب ينافس في موضوع السعر ويخش في الفئة هذي اللي هي حساسة سعرياً شوية نوعاً ما.
قلت الفئة ذي حساسة سعرياً السيارة راسية ثابتة حلوة وممتازة؛ 6 سرعات ألكترونيك مافي تعشيق من فوق مافي مناطق عمياء الكرسي يعني يدوي أكثر من أن هو كهربائي الدركسون يدوي مافي نافيجيشن يعني المقصود منافسة سعرية بحته.
مافيها جمال؛ عيب السيارة ذي ماهي وحشه اللي يحب السيارات الألمانية ويبغى جودة ألمانية أوروبية ثبات فرامل رساوة سيفتي 8 إيرباقات راح ينبسط على السيارة ذي تماماً؛ الآن اللي يبغى والله الدلع شوية يبغى حاجات هنا هناك أكثر شوية فيمكن هذي نوعاً ما كذا شوية أيش يعني الواد عبده ناشفة شوية ساكتة كذا شوية بس بتؤدي المطلوب منها بشكل رهيب أتمنى لو المصنع شوية شوية إهتمام شوية رتوش بسيطة والله مو أكثر رتوش بسيطة كشاف هنا هناك حاجة ياريت يجي المحرك التوربو أعتقد راح تصير السيارة ذي جبارة شوية دلع الناس ولفت والكوريين خربوا الشعب بالكامل العالم الشعب العالمي مو بس عندنا.
زي ماقلت الله يسلمكم السيارة ذي يمكن شوية الواد عبده ماهو باين مرة كثير وسط الزحمة بين الناس الكوريين خربوا الشعوب العالمية كلها دلعوهم وأدوهم كل شيء ونوروا كل حاجة حلوة الصينيين جايين وراهم هنا فيه تاريخ قديم جداً في ناحية السيفتي في ناحية الثبات أكبر الشركات في العالم تملك يمكن وهي أكبر شركة تملك منتجات أو أسماء تحت اسمها من ( بوغاتي ؛ بنتلي إلى لمبرغيني لـ أودي ) ماشاء الله يعني أمبراطورية.
السيارة عشان المنافسة السعرية ركزوا تماماً واضح على الصرامة أو العقلية الألمانية وهي يعني شيء ممتاز أنا بعيب عليها لكن كل شيخ وله طريقة ركزوا على عملية أعطاك صلابة إيرباقات ثبات فرامل كل شيء أعطاك هو وفي وسط الزحمة نسي شوي رتوش بسيطة لأنه يمكن برضوا العين حابه تشوف حاجة حلوة تعرف الواحد يشوف السيارة حاجة وكذا فهذا لا علاقة الحب الألمانية يعني ناشفة يعني حتى أنت شوف بالإيطالي واحد يقوله أحبك بالإيطالي ( تيامو ) بالفرنساوي ( جوتيم أو جوتيم ميشوغي ) حاجات دلع كذا بالألماني ( أشلبديش ) يعني أنا ماني عارف أنت تقولها بتحبها وإلا بتخانقها فهمت علي كيف فهو نفس العقلية ذي فيها صلابة فيها صرامة فيها هندسة بحتة فمطبقينها في السيارة تاخذ كل اللي تبغاه ويهتم في حياتك ومهتمين بكل شيء بس حاية الدلع شوية أتمنى فيه ترى أنا راجل رسمي وشديد مالنا فيه كذا فأعتقد فلسفة السيارة ذي جاية من ناحية ذي كثير يعني لاشعورياً طلعت في السيارة هذي بس أعتقد لو شوية رتوش بسيطة زي ماقلت كشاف وجناح خلفي بسيط حاجات دلع هنا وهناك من ناحية السيفتي والثبات والرساوة جبارة. نجرب التسارع دحين بسم الله الرحمن الرحيم نجرب التسارع 11,28 الإزعاج على سرعة 90 كيلو 668 أتمنى أنه كذا قدرنا اليوم الله يسلمكم نشرح لكم على البطل الصغير هذا ممتاز عملي أنا دائماً يمكن أحب أركز شوية على ناحية أنه الشوارع ممكن تكون خطر الناس تكون كثير ماشية ومو كل الناس مركزة في وقت واحد مستوى تركيز الوعي يختلف من واحد للثاني فهنا مهم جداً يهمني أنا حياتي وسلامتي أنا واللي معايا في السيارة واللي في الشارع فدائماً الأمان والسلامة والإيرباقات دائماً أركز عليها كثير لأنه من بعد إذن الله ورحمته سبحانه وتعالى بتنقذ حياة ناس كثير؛ من ناحية الأمان السيارة رائعة جداً جبارة أتمنى شوية رتوش اللي ذكرتها العيوب البسيطة أو الأشياء البسيطة ذي لتحلية السيارة شوية سكر عليها لا أكثر ولا أقل.
وختاماً.. أتمنى تكون التجربة ذي ناسبتكم والتجارب لنا كثير وشكراً لكم.
- يرجى تسجيل الدخول لإضافة تعليقات