تجربة مرسيدي إيه 45 اي ام جي
|
تجربة مرسيدي إيه 45 اي ام جي
السلام عليكم.. اليوم معانا تجربة الـ إيه 45 اي ام جي؛ خلينا ناخذ شوية راح ناخذها بالتفصيل بس خليني أعطيكم حاجة بسيطة إيه هذه الفئة 45 عمر شركة اي ام جي 45 سنة.
أيش يعني اي ام جي؟
اي اللي هي الحرف الأول من من الشريك الأولاني هم اثنين شُركاء؛ Hans Werner Aufrecht اللي هي الـ A) )من هنا جايه والشريك الثاني اسمه Erhard Melcher (M) اللي هي الـ (M) هذي EM الـG جايه من فين الشريك الأول مولود في بلد اسمها GroBaspach فهذي AMG؛ الشركة ذي كانت شركة مستقلة اثنين مجانين سيارات واحد غاوي تصاميم والثاني غاوي تعديل ميكانيكا واجتمعوا سوا وعملوا شركة تعدل السيارات.
من التعديلات اللي عملوها في السيارات وابتدوا ينجحوا في مرسديس اس 300 عام 63 وابتدوا ماشاء الله سيطروا دخلهم علي دخلوا شركة مرسيدس معاهم شالت نص الشركة تقريباً بعدين شالت الشركة بالكامل وعملت الذراع الرياضي حقهم فهذه هي AMG وهذي أيش يعني كلمة إيه45. خلوكم معانا الآن علشان إن شاء الله نخش في تفاصيل السيارة هذي بس أحمسكم 360 حصان فتح كلام على حاجة يسموها بوكيد روكيد هذا مسمى اللي برا اللي هي بيكون صاروخ بيعتبروا واحد معاه صاروخ بس حجم الجيب فهذا هو صاروخ يتحط في الجيب صغير كذا هذه هي البوكيت روكيد هذي الـ إيه45.
معايا أخويا ثامر موصلي صاحب السيارة أخوي ثامر صراحة ماقصر اتجمل علينا واليوم يعني سلّفنا السيارة هو بحضوره وماشاء الله شايفه مبدع في السيارة عامل تعديلات وصارف عليها مبلغ محترم.
حسن كتبي: أخويا ثامر كيف حالك أيش أخبارك؟
ثامر: الله يسلمك
حسن كتبي: أمورك بخير إن شاء الله
ثامر: الحمد لله
حسن كتبي: الله يرضى عليك......
أول شيء عاجزين عن الشكر بالنيابة عني وعن السادة الجمهور كلهم بشكرك جداً على السيارة وتجربتها اليوم
ثامر: الله يعطيك الصحة والعافية
حسن كتبي: الله يرضى عليك.. ثامر ليش اشتريت السيارة؟ وبكم اشتريت السيارة؟ أيش اللي عاجبك فيها؟ ولسى فيه السؤال الأخير أيش اللي ماشاء الله اللي معدله فيها؟
ثامر: والله اول شيء ليش اشتريت السيارة عشان ماكينتها
حسن كتبي: 360 حصان
ثامر: هي أقوى سلندر في العالم 360 حصان فهذا أكثر شيء حمسني فيها أكثر شيء عجبني فيها الشكل الماكينة الداخلية اللي من جوا اللي هي الكبيرة.
......................................
طول السيارة 429سم؛ العرض 177؛ الارتفاع 133؛ العزم 450نيوتن متر؛ 360حصان؛ وزن السيارة ماهي مرة خفيفة على 1428 لغاية 1530 كيلو حسب وزن السيارة فهذي يعني متوسط 1450 – 1480 هذا هو وزن السيارة؛ 7نمر؛ دبل كلتش؛ إليكترونيك الجيربك حقها.
كل ما أطالع في الماكينة هنا شوي أتلخبط ماني والف على ماكينة مرسيدس بالعرض واي ام جي فهي السيارة طبعاً دفع رباعي الماكينة جايه بالعرض الكونفقريشن شوية غريبة أو جديدة عليا بالنسبة للسيارات الألماني لكن زي مانقول هم بيدوروا على فئة جديدة فئة شبابية فواكبوا العصر الموضه بس بيحافظوا على القيم والتقاليد حقت شركة مرسيدس؛ ثامر أخويا ماشاء الله ما قصر عمل حاجه حلوة لما بيقولوا السيارة راسية حلوة كثير فيها عملت شيئء قال لي أيوا فهذا الاستراس قضبان عليه تأرجح فهذي كانت وحده من الأسباب اللي السيارة أعطتها رساوة عالية جداً فوق أنه السيارة راسية رستها بزيادة.
طبعاً زي ما إحنا شايفين هنا التوربو ساقط لتحت شوية كذا بالاسنسرز حقته بالكامل بالإنتركولر المكان ضيق زحمة شوية هنا ماراح أقول لكم لا لكنها ماشاء الله بتأدي غرض؛ السيارة دفع رباعي؛ 7نمر الجيربكس إليكترونيك وهي كلمة فورما تك لمرسديس لما تقلاقوها ورا كلمة فورما تك معناتها دفع رباعي.
السيارة هذي مجمعة أشياء كثيرة غريبة في بطن بعض؛ ليش السيارة ذي سوتها شركة مرسيدس والشركتين اي ام جي أيش اللي عملوه في السيارة ذي شرحت لكم أيش يعني كلمة اي ام جي والـ إيه45 خلينا نشرح ليش الفئة ذي؛ سيارة المرسيدس عندهم أكثر شركة من أكثر الشركات في العالم عندها سيارة لكل فئة يعني ماشاء الله من كثر ماعندهم الفئات ملوها صار أحياناً يكون الهامش بينهم لكل فئة وفئة ضيق جداً فقالت لك إحنا نبغى العُملاء اللي هم شباب أصغر من متوسط أعمار عُملاءنا في مرسيدس الآن بعشرة سنين يبغى مرسيدس يبغى السيفتي يبغى الأداء الرياضي فأعطوله 660 حصان الفئة هذي؛ طبعاً الفئة ذي تجي بالبودي هذا الـ إيه وتجي بالـ سي ال اي اللي هي أربعة أبواب اللي خلينا نسميها بيبي سيالس طبعاً عشان الأسماء كثير يمكن تحوسوا معايا فالواحد يضطر يفتح كتالوج ويقعد يطالع في كل موديل.
أيش اللي يميز السيارة هذي؟
2000 سي سي؛ 4سلندر ؛ توربو360 حصان؛ بمتوسط حسبة صغيرة اللتر يعطينا 180 حصان هنا. خلينا نقول أيش يعني 180حصان؟ خينا أفكركم النيسان الجي تي آر طيارة اللي أنا معجب جداً في السيارة هذي تعطينا في اللتر الواحد 161 حصان تقريباً؛ الميكلارا 650 إس اللي صورناها وريتكم هي قبل كذا 650 حصان طيارة عاد هناك 171حصان في اللتر؛ الصغير ذي 180حصان في اللتر الواحد فيعني صراحة تفوق على الشركات كثير جداً نتكلم من مقياس لتر حصان فماشاء الله يعني ضغط التوربو هنا حاطينه حوالي 21 بي إس آي ماهو لعبة أبداً يعني فجماعة اي ام جي شادين حيلهم جامد؛ وقلنا الفئة السعرية سعر السيارة من 220 كحل متوسط وعندنا الله يسلمكم الفئة العمرية اللي هم مستهدفينها يبغوا فئة الشباب.
السيارة طبعاً إحتفالاً بالعيد الـ 45 – 50 سنة من عمرهم خلينا نقول فآخذه كثير من تصاميم الخمسينيات؛ عاملين شبك أنه يصير مدفوف جاي لقدام مُتقدم لقدام كثير هذي قاصدينها زي السباقات في الخمسينيات؛ عندنا كمان النحت حقت السيارة إن كان من هنا أو فتحات برضوا تاني الشبك حاطينه قدام؛ عندنا الإسبلترز موزعات الهواء مثبتات باستخدامها هنا استخدموا السيارة كواجهة كمُقدمة وكقزاز أمامي وسقف السيارة كله أستخدموه بيصير أنه كله عملية أقل إحتكاك في الهواء وأكثر نعومة في إختراق الهواء بأقل إحتكاك عشان الصوت أقل صرف البنزين أقل كلها في النهاية 4 سلندر 2000 سي سي على قد ماراح تكون صرف بنزين هنا معقول وحلو لكن وقت مارجلك تتحمس تاخذ حماسها في السيارة ذي راح تلاقيها ماشاء الله تشرب البنزين شُرب فانتبه أنت كيف تبغى تسوق السيارة؛ الشاهد عندنا هناعاملين كل الأماكان اللي حاطينها فيها لتثبيت السيارة؛ طبعاً الكِت حقت السيارة أخونا ثامر هنا بزيادة توصى حاطط لها كِت إضافية غير اللي جايه معاها من المصنع كاربون فايبر وجاي خط أحمر جايه كمان كلها علشان تخترق الهواء وتزيد ثبات السيارة في الأرض.
طبعاً الكبوت هنا مغير بكبوت رياضي كاربون فايبر وزنه خففه حتى تبريد إضافية باستثناء هذي اللي شوية جايه الدومز اللي جايه حتى تشوفوها في المرسيدس سي سيكس ثري المصمم أعتمد حاجة وحده لأنه مع الأنظمة الجديدة لحماية المُشاة فكان لازم يجي إنسيابي وفي نفس الوقت أملس عشان حماية مع القوانين الجديدة حقت حماية المُشاة فبالشكل ذا بتحمي السيارة من هنا وفي نفس الوقت بتؤدي الغرض في إختراق الهواء بشكل أنعم بدون يعني خلني أقول بأنعم مايمكن؛ النقطة الثانية القزاز الأمامي زي ما إحنا شايفين هنا جاي مايل لورا كثير علشان يستخدمه كأنه جناح منه هو فيه بيطلع الهواء بشكل مائل يعني بشكل ناعم بيتم إختراق الهواء بحيث ذي بالكامل من هنا لفوق فبيستخدم سقف السيارة والقزاز الأمامي من ضمن أو من تحت بيستخدمه كله لتثبيت السيارة على الأرض من فوق الهواء ضغط عامودي بنعومة بيطلع يثبت السيارة تحت ومن تحت بيمنعوا الهواء يتجمع تحت السيارة فبتثبت السيارة.
طبعاً السيارة نلاحظ شوية التصميم الله يعينكم تعب عيونكم تتابعوني شوية اليوم.. التصميم جاي كأنه جزئين أو حزامين الجزء العلوي لو تلاحظوا كأنه منحوت نحت أتكلمنا على الكبوت فوق وبعدين خذوا بالكم هنا وراح أكمل معاكم في التصميم اللي ورا أوريكم هو وعندنا جزئية اللي تحت الحزام اللي تحت الحزم خلينا نسميها لو تلاحظوا جاية بشكل دائري تماماً مُش نص دائري أحياناً رُبع دائري لا دائري بالكامل وفعلا مصغرين المسافة لأقصى حد ممكن قاصدينها مو أنه السيارة بس واطية هي طبعاً اوطى اللي هي مثلاً اللي ماهي اي ام جي الـ إيه مثلاً 250 فيجي أوطى منها بس القصد هنا مو بس رساوة بيقللوا لعبوا جامد في حكاية نفق الهواء بيقلل كل كمية التيربلنس اللي هو الإضطراب حق الهواء مثلاً بيعدي من هنا بيقللوه لأقل درجة ممكنة مع ضغط السيارة من فوق عن طريق القزاز الأمامي مع السقف فلو تلاحظوا كل هذي جزئية هنا وراح نكمل على الإسبولورات أو الجراوند فكت الموجودة هنا تحت فهذي الجزئية كاملة من هنا راح أوريكم كيف تتشعب كأنها ثلاثة أجزاء هم جزئين بس كيف نظرياً ثلاثة أجزاء. تلاحظوا دحين هنا الحزام عرض شوية واللي هنا بيطلع لفوق علشان يكمل عملية الهواء غير اللي تحت مكمل في خطه مستقيم الفكرة كلها الهواء بيلتقي من هنا بيمر بس بدل مايقعد مجوف أو يخلّي السيارة عريضة من ورا علشان الإنسيابية علشان يدخل فيها الكفرات قالك لا أستخدم البودي بالكامل علشان يزحلق الهواء لورا فتثبت معانا السيارة.
طبعاً الحزام زي ما إحنا شايفين طبعاً خذوا بالكم كمل النحت لغاية ماوصل معانا لغاية فوق هنا ومكمل معانا لفوق واللي تحت كمل مرور على الكفر الخلفي منها تبريد ومنها تشتيت الهواء من تحت ومن فوق وفي نفس الوقت سحب الهواء الإضافي من هنا وفي نفس الوقت النفق الهواء اللي هنا الإيرتيربلنس قفلوه فصار الهواء من فوق بالجناح العلوي ومن جوانب ومن تحت هذي العبقرية صراحة أنا اللي اسميها الأوروبية في عملية تصميم السيارات والمرور خلال الهواء بأفضل شكل ممكن بأحسن مايمكن. طبعاً هذي خلفية السيارة كمالة النحت يعني حتى لو طالع من هنا كيف عملية الهاواء داخل طبعاً هذا الجناح اللي عليها من الأصلي من المصنع من شركة اي ام جي وهذا الكِت الإضافية سي3 المرحلة الثالثة والمتقدمة من شركة نورييف الأسبليرز اللي تحت؛ عندنا نوع يجي فيه كاميرا خلفية ونوع بدون هذي الأسبولورات الأصلية تحت وتجي لونها كروم الشاكمانات بس هنا جايه كروم مطفي أسود وعندنا هنا الكِت الإضافية كمان زي ماكلمت علشان عملية تسهيل وتثبيت السيارة بشكل أفضل.
الشنطة..الشنطة هذي طبعاً زي ماقلت الشركة حقت نورييف؛ الأستبنى موجودة هنا صغنطوطة بس يعني فيه مكان كفاية إنك تحط فيه عفش أو مقاضي أو أشياء بسيطة لو تبى تكمل وطبقت الشنطة بالكامل راح يكون عندك حوالي 1200؛ 1157 لتر مكعب تقدر تمليه عفش أو مقاضي أو أيش ماتبغى لو طبقت الشنط الخلفية.
هذا مفتاح السيارة مرسيدس سهل بسيط المُعتاد محافظين على التقاليد حقتهم القديمة مع أنه مو محتاجين مفتاح يمكن يتعمل كرت حتى لكنهم محافظين على القديمة تقريباً؛ وهنا مكتوب علامة اي ام جي وحدها الإستيكر ذا تكلف حوالي 150 يورو.
طبعاً الكفرات جايه نفس المقاس قدام وورا لأنه أعتمدوا على عملية إنسيابية جانبيه ومن فوق ومن تحت ومن الجوانب علشان مايخلوا الرفرف يضغطوا لأنه السيارة حجمها نوعاً ما زي مابيقولوا من فئة الكومباك؛ طبعاً الكفرات جايتنا عرض 235/35 ارتفاع على 19؛ على قد ما طبعاً الجنوط ماهي (11:23) وزنها خفيف الجنوط الأصلية حقت اي ام جي بس خلينا نكون واضحين على قد مقاس الكفر هذا رياضي ومخفظين جداً عملية الهواء لكن الكفر لوبروفايل يعني البروفايل حقه الجانبي منخفض شوية بمعنى آخر علشان تستمتع بالسيارة ذي ياتكون حافظ مكان الحفر والمطبات في الشارع فين ياتطلب جهاز ملاحه خاص فيك بحيث أنه يسقط لك كمان مع الشوارع أماكن الحفر والمطبات فين تاني مرة لأنه راح تكون نوعا ما قاسية كثير لو أكلت لك مطب أو حفرة أو خندق يعتمد على اللي راح تقابله قدامك فيعني يمكن هذي وحده من الأشياء اللي هي داون سايت شوية الناحية المنخفضة شوية في السيارة.
ماشاء الله التسارع دحين إحنا ثلاثة أنفار في السيارة.... فيه بورش ورا بيحاول يلحقني.... 180,190تقريباً أديها فرملة ماشاء الله تبارك الله ماشاء الله تبارك الله؛ فيه واحد ألماني مجنون طلعت في باله الفكرة وأنا ماني متأكد إذا طلعت مضبوطة لكن طلعت صح لا ماشاء الله فيري نايس لما تعمل تك أوف الشاصيه جبار.
طبعاً السيارة ذي يعني خلينا نكون واضحين على قد ما أنه 90% من العزم بيكون على 1200دورة يعني يادوب السيارة بتقول ياهادي بسم الله قد السيارة أعطتك 90% من العزم حقها لكنه الشاصيه جبار؛ أداء رياضي مره حلو وفي نفس الوقت يعني السيارة مجنونة بس طبعاً 4سلندر 2000 سي سي دائماً السيارات 2000 سي سي مافيها ذاك العزم العالي فبيحطوا لها توربو ودايركت إنيجيكشن, 16 صمام بس طبعاً كل مالتوربو ياخذ راحته الأيربين يعلى دوران ماكينة أعلى توربو ياخذ راحته أكثر تسمع السيارة أيش تغني برونو وأوبرا وتلعلع معاك وتنطلق اشاء الله أنا جربتها يعني يا دوب إلى حد ما 7نمر الناس ممكن تقولك ياخي 6نمر أفضل لكن الـ7نمر ممكن في التعشيق اللي فوق ممكن خلينا أقول لو يتم تحسينها بجزء من الألف من الثانية لكن في النهاية 4سلندر 2000 سي سي كلها ياجماعة الخير لو 3000 سي سي أقولك والله هذا وارد فبالنسبة هي السيارة كذا أداء روعة على قد أنه أيش هذا كل مايعلى بتغني معاك السيارة. طبعاً السيارة أكبر وأول منافس وأنا في بالي على طول طبعا ًحسب القوة إذا أخذناها العادية بدون ي ام جي فيه عندك الجولف الجي تي آيز أخذتها بالـ اي ام جي عندك الآودو إس ثري والبي إم دبليو الـ 135إم؛ أقوى 4سلندر توربو عادية من المصنع 272حصان بس عادية خل نتكلم هذي من المصنع فرع أداء رياضي فـ360 حصان الـ272 حصان اللي هي الكايديلاك السي تي أس 4سلندر توربو 272حصان؛ طبعا ًإذا دخلنا على تعديل يعني عد وأغلط أنه ماراح تخلصوا بتخشوا لغاية 1000 حصان كمان ماعندك مشكلة لكنه خلينا نتكلم على السيارة بشكل عام؛ السيارة حلوة بتعطيك أكثر من شخصية بتتحكم فيها حسب التعليق حقكها أنه السيارة حلوة ناعمة السيارة إقتصادية فيها زر حق الأيكونمي اللي هو يوفر في البنزين بتطفي معانا السيارة تضغط الزر حقت الأداء الرياضي يعطيك أداء رياضي تعطيك زر أو تحكم يدوي في نفس الوقت يعني أنا شايف السيارة هذي اليوم كل اللي داير في بالي كمان سيارة ثانية حابب أشوفها بشوفها في الأسواق أن الجولف الجي تي اي الـ400حصان أيش راح تسوي هذي 360 وماشاء الله يعني أولريدي الواحد ماشي بشويش والإبتسامة مو قادر يعني يخبيها بس ردود الفعل السيارة جداً سهلة وجداً بسيطة وهي ماشاء الله تشوفها؛ الآن فيه ناس يقولوا ياخي التكييف حق الألماني تعبان مرسيدس بنز عام 2001 غيرت التكييف حقها لأن نفس تكييف شركة نيربون اللي بتعطي تويوتا ونيسان فمن عام 2001 اتحلت المشكلة دي عرفوا مرسيدس القديم وجربوه وهو اللي بعد 2001 يعرف الفرق يعني ماشاء الله قاعد جوا فريزر مو تكييف.
السيارة طبعا ًلها ضريبة أنه ماحد يمكن أي سيارة فيه علاقة عكسية تبغى سيارة مريحة جداً راح يقل الناحية الأداء الرياضي والتماسك في الطريق تبغى ناحية رياضية وتماسك رياضي راح تقل الراحة فهنا حبوا يجمعوا لك من كل بستان زهرة فعندك التحكم في السيارة راح يعطيك كل الأشياء اللي تبغاها فأنت تختار رياضي أو إقتصادي أو مُريح عاد إختيارك يعني زي مابيقولوا مسؤول عن إختيارك. السيارة تجي طبعاً هذي الشاشة تجي فيه نوع لا ممكن يتركب عليه زي الإستاند يركب عليه إذا عندك أندرويد وإلا أبل والا يشتغل عليها بس هذا أحلى؛ طبعاً فيه نافيجيشن فيه بدون كاميرا خلفية فيه بدون حسب المواصفات؛ الحلو الزياق الحمراء هذي البلاستيك بسأله بقول له حلوة أنت مركبها قال والله السيارة ذي ماجات فيها المهم سأل على قطع الغيار هنا في الوكالة قالوا له بحوالي على كل وحده بـ500 ريال فأضربوها في خمس حبات 2500 فجابها من ألمانيا كلها الخمس حبات قطعة وحده بـ700 ريال ففيه فرق شوية كأنه نوعا ما هنا في السعر؛ الأحزمة الحُمر زي ما إحنا شايفين هنا الحزام الحزام الأحمر حق السيارة هذا الحزام برضوا كمان جابه شكله جداً رائع كلفه من ألمانيا 1000 يورو هنا عندنا في الوكالة قالوا له بـ12,000 ريال ومايركبوا له هو كمان فهذي يمكن من بعض العيوب اللي شوية يمكن نوعا ما اللي داخله الشركة سيارة غالية زي دي أنا أدفع في سيارة غالية بس كمان دلعني شوية ماتفتري في فأعتقد هذي وحده من العيوب اللي موجودة في السيارة أو في (16:55) حتى جنوط البرابس أشتراها في الوكالة كان بيسأل قالوا له بـ45,000 اتصل في دبي فيه برابس قالوا له بـ 75,000 في الوكالة يعني 45,000 زي مابيقولوا بعد حب الخشوم بالديسكاوند بالخصومات بكل شيء بـ 45 في دبي بـ 75 فجابها من ألمانيا بأرخص كثير بأقل سعر بس ماني فاكره الآن ماشاء الله مع كمية المعلومات اللي قعدت أسألها.
طبعاً السيارة الليآوات حتلاقوه هنا في المرسيدس سي كلاس الجديدة السي ال اي الـ إيه يعني آخذه الشبه العائلي في العائلة من نفس الطبلون عشان شكلها حلو طبعاً هنا إذا ضغطت على زر أول ضغطة راح تطلع معانا كلمة سبورت هناك حمراء إذا هي باينه معانا باللون الأصفر هذي كلمة سبورت الأداء الرياضي وترجع ثاني مرة إذا كذا؛ الشاشة حقت مرسيدس سهلة مبسطة كلمة آيكو اللي هي هنا نفس اللمبة تحت الخضراء اللي هي عملية أنه السيارة يصير بنزينها أقل وتطفي مثلاً في الإشارات وفيه عندنا حاجة جداً مهمة تحطوا طبعاً الزر برا فيه أنظمة زر إيكو تكون أنت الله يسلمك ماشي جوا البلد جوا المدن فيكون صوت الشاكمان كمان يكون اوطى بكثير ماتجي جنب مستشفى أو مكان أو مدرسة أو أي مكان عندهم الناس هناك بيتعبدوا فيه تقوم والله تزعجهم بصوت عالي تبغى الصوت الرياضي تروح حلقة السباق بيكون صوت الشاكمان أختلف معاك وزي ما سمعنا أول وزي ماراح نسمعه الآن راح نسمعه بالنغمة العادية وبالنغمة الرياضية مع بعض فالعداد ماشاء الله وصل 320؛ طبعاً ماهي السرعة الفعلية السرعة الفعلية مقفلة على 250 كيلو متر في الساعة وإن كان عاد أحياناً بعض العدادات بتكون متفاعلة فيه ناس كصثير أوووه العداد حقي جاب 270 ياعمي ماجابت السيارة الفعلية 270 لأنه العداد هذا بيجيب التقريب شوية ماهو السرعة الفعلية فعلاً لكنه إمكانية التعديل على السيارة ذي ماشاء الله يعني مفتوح على الصبح هذا يعني حاجة كذا بسيطة حبينا نشرح لكم فيها السيارة على استعجال؛ عندنا سقف البانوراما. الآن أنا قاعد في الكرسي الخلفي صدق وأمانة السيارة فيها كرسي مساحة حلوة جداً مريحة بس لما أنا كنت آخذ راحتي قدام وقاعد فنوعاً ما ماينفع أنا بطولي ذا أقعد قدام وأرجع بطولي ذا أرجع ورا فنوعا ما ضيقة لكن لو جينا شفنا الناحية الثانية فعلاً ترى فيها مساحة حلوة على ماقد السيارة صغيرة يعني بكل أمانة فيها مساحة جداً حلوة. دحين أتكلمنا على المساحة اللي تحت وزي ما أنتوا شايفين أنا مرجع الكرسي لقدام فنوعا ما أنا متضايق هنا لكنه فيه مساحة حلوة لابأس فيها؛ فيه نقطة ثانية جدا ًمهمة أنا قاعد هنا ورا دائماً كان أحياناً كثير أحس نفسي مضطر أعمل كذا أو أسقط في الكرسي تحت شوية لا فيه مساحة حلوة لابأس فيها أبداً أنا قاعد هنا فوق ولابس الكاب ومستريح يعني راسي ماوصل السقف وكمان عجبتني حتى هنا برضوا من تفكير شركة مرسيدس عندنا التهوية حقت التكييف السيارة ماشاء الله فريزر وكمان عندنا فتحات تبريد ورا فماشاء الله يعني اللي يقعد جوا السيارة ذي ماراح يحس بالحرارة راح يستمتع بالتكييف. "ههههه ياخي أحياناً ماينفع أنا أخل زي السيارات ذي عامل زي الديناصور اللي طلع من بيضة ورجع دخل بعد ماكبر الديناصور دخلوه البيضة تاني" البوكيت روكيد صواريخ حقت الجيوب السيارات السريعة الصغيرة جداً فالسيارة صراحة حلوة راح أرجع نقطة ممكن أشرحها يعني أنا على حجمي دائماً أحياناً كثير بركب سيارات السيارة مُريحة بس على حجمي أنا زي ما أركب قدام واحد حجمه كبير طويل شوية الكرسي الوراني بيكون ضيق شوية؛ مساحة السقف لابأس فيها.
السيارة حلوة بس قطع الغيار زي ماشرحنا شوية مبالغ فيها يمكن سعرياً شوية لكنها السيارة من أجمل مايمكن.
إمكانية التعديل على السيارة وتلغيمها وتوصيلها لمراحل تانية موجودة ماشاء الله وزي مايقولوا (20:38) موجودة من شركات متخصصة من اي ام جي من كاسون من مليون شركة تعدل لك على السيارة والحلو في الألمان أو الأوروبيين عموماً يعطيك تعديل للفرامل, لرساوة السيارة, للثبات, للسرعة, للتسارع يعطيك كل شيء؛ وحده من أسرع السيارات في العالم في فئة الـ 4سلندر مابدي أقول أسرعهم لأنه متأكد الصراع بين الألمان مابيوقفوا الأوربيين استنوا دحين لما تنزل طبعاً الـ إم 135 إم35 نتكلم حوالي مثلاً مئتين وكسور ألف ريال فولكس واجن إل آر على 190,000 ريال كلهم فوق الـ 300 حصان طبعاً التوربو بيعطي عزم وإن كانت 6سلندر 3000 سي سي إذا دخلت في منطقة ثانية دخلت 3600 بتعطي عزم كمان جبار استنوا الرد من المنافسين أنا أبغى اشوف الرد 400 حصان من الجولف وغير ضيق الكراسي الورانيه شوية تحت على قد حجمي الكفرات واطية شوية؛ السعر ممكن يكون أحسن من كذا واتمنى إن شاء الله تكون ناسبتكم التجربة ولنا تجارب انية كثير مع بعض وشكراً لكم.
- يرجى تسجيل الدخول لإضافة تعليقات