تجربة مفصلة للبي ام دبليو الفئة السابعة 750 2016 Li xDrive

فيديو يوتيوب:

تجربة الأستاذ القدير: يوسف القحطاني .. له قناة رائعة جداً على اليوتيوب على الرابط التالي:
https://www.youtube.com/channel/UCWhWV5FcGYb3ZrCOHGDCigw

السلام عليكم وحياكم الله.. اليوم سيارتنا الشكل الجديد من البي ام دبليو750 Li xDrive؛ السيارة من تصميم اللي أصوله لبنانية اللي هو كريم حبيب اللي صمم الموديل اللي قبل هذي واللي فعلاً كان يعني نقلة نوعية عن الشكل اللي كان مسويه كريس اللي هم الـ 2002 إلى 2009 اللي كان أسواء موديل طلع بالبي ام بس السيارة طبعاً الكثير اللي يشوفها يقول مافي تغييرات زي اللي شفناها في مرسيدس فالسبب البسيط جداً أن المرسيدس ضيعت الهوية يعني للأسف الآن لما تشوف المرسيدس أجمل موديلات كتصميم اللي كانت موجودة بالسبعينات والثمانينات كانت أجمل الموديلات من التسعينات وورى صار عندهم مشاكل الأشكال الجديدة مالها علاقة بالأشكال القديمة فنلقى الـ700 هذي متغيرة بالكامل بس لازالوا محافظين على الأشياء الأساسية بالسيارة يقول لك لكل سيارة فيه مثلاً لها فيه توقيع لكل سيارة هذا مايتغير السبع مئة كانت بادية من 1977 كبديل للشكل القديم اللي كان باديء أصلاً من الخمسينات اللي هو الـ501 و الـ502 وهذي طبعاً البي ام نزلت على السيارات هذي اللي هو 8سلندر أول سيارة8سلندر تطلع من ألمانيا كانت البي ام اللي هي الـ501 و 502 نزلوا بعدها اللي هي E3اللي هي أربعة أبواب وكان فيه E9 اللي كان جداً شكلها عنيف وكان جداً aggressive وكانت مشهورة بالجناح الكبير وكانت تستخدم ف الريسنغ يعني من أجمل السيارات اللي صنعتها ثم نزلّت 700 كاسم 700 بـ1977 وكان له كود بالمصنع يسمونه الـE23 استمر من الـ77 إلى 86 ثم نزل بعده اللي هو E32 من 86-94 اللي تبدل بالـ E38 اللي تعتبر أجمل 700 إلى الآن والسيارة هذي اللي استخدمت تقريباً في 12 فيلم على مستوى العالم كانت الـE38 اللي هي من 94-2001 ثم جانا الشكل اللي للأسف أنا أعتبره عار على البي أم اللي هو E65و E66 اللي هو من 2002-2008 تبدل بالـ F01وF02 من 2009 اللي هو من تصميم صاحبنا حبيب إلى 2015 الآن هذي تعتبر الجيل السادس من الـ700 راح تستمر معانا 7أو8 سنين قدام؛ التغيير بالكامل من برا ومن داخل بس signatures موجودة. طبعاً الـ700 الجديد اللي معانا اليوم يسمونه الكود حقه اللي هو الـ G12 البي ام أي إختراعات أي تصاميم جديدة تبداها بالسبع مئة لأنها هي الـflagship اللي هي أكبر وأفضل يعني سيارة موجودة عند البي ام فأي إختراعات أي تصاميم جديدة تطبقها على السبع مئة ثم تنزلها على السيارات الثانية.

أول إختراع سووه بالسيارة هذي اللي هو راح نسمع السيارة قاعده تقراء حركات اليد اللي هو تتحكم بالسيارة بحركة اليد إنك ترفع المسجل أو الصوت بالحركة هذي وتخفض الصوت بالطريقة هذي الـsensor طبعاً موجودة هنا وتقدر ترد على التلفون تقدر إنك تسوي رفض أو ريجيكت للتلفون والحركة هذي راح تلاحظ أنها دائماً السيارة تقراء أي حركة لليد تقدر أنت تبرمجها يعني بالشيء اللي أنت تبغاه وتقدر طبعاً الفيتشر هذي أو الشغلة هذي تقدر إنك تطفيها عن طريق الآي درايف.

الإختراع الثاني اللي أول مرة يُطبق على سيارة يقولون عليها الفوليوم بروديكتشن يكون فيها عالي اللي يكون فيها الإنتاج كسيارة تنتج بشكل كبير الكوك بيت أو قمرة القيادة مشغلين فيها كاربون فايبر بشكل رهيب نقدر نقول الكاربون فايبر يُستخدم غالباً في السيارات اللي هي السوبر كار زي الماكلارين والفيراري والباغاني يعني السيارات الهاي إند اللي بالملايين.

الإختراع الثالث اللي هو المفتاح مفتاح السيارة أجمل مفتاح راح تلقاه موجود بسيارة إلى اليوم يعتبر زي الموبايل شكله زي الموبايل فيه الساعة فيه شغلات كثير راح نسوق عليها إن شاء الله ديمو يجي عليه أوبشن اللي هو إختراع ثاني اللي هو إنك تقدر تصفط السيارة إذا عندك باركينغ في البيت يكون ضيق ماتقدر تفتح الباب بحكم أنه أبواب السيارة جداً عريضة والسيارة عريضة فتقدر تنزل من السيارة وتقدر عن طريقها إنك توقف السيارة بالشكل اللي أنت تبيه وفي نفس الوقت تقدر تطلعها.

ريموت البي إم الـ700 تحفة فنية وبنفس الوقت يعني تحفة تكنولوجية يعني كأنه جوال تتش يبين لك الساعة يبين لك شحن السيارة مسكرة الدرايش مسكرة مفتوحة بنفس الوقت يكون تتش معلومات السيارة كم باقي فيها بنزين وتقدر تشغيل المكيف نفس الشيء فيها أوبشن اللي هو اللي تصفط السيارة عن طريق الريمو هذا أوبشن لازم تطلبه؛ طبعاً هذي يفتح لك الشنطة هذا يفتح ويسكر السيارة هذا يفتح هذا اللي يشغل لك الأنوار والمنبه إذا ضيعت السيارة؛ فيه الجنب اللي هو يطفيه واللي يشغله فيه فتحت يو إس بي شحن موجودة بالمنطقة هذي عجيب روعة.

الشغلة اللي بعدها اللي هي أول سيارة يحطون لك فيها تابليت موجود بالكراسي اللي ورا تقدر تتحكم بالسيارة من ورا بالتابليت تقدر تشيلها إن شاء الله راح أسوي عليها ديمو إن شاء الله تشوفونها. والإختراع الأخير اللي كان نازل على i8 اللي هو الليزر لايت الـ700 تنزل كستاندرد؛ الإضاءة اللي فيها بالكامل قدام ورا من داخل تقدر تطلب عليها اللي هو الليزر لايت اللي هي تعتبر LED بنفس الوقت لمن تشغل العالي فيها يستخدم تكنولوجي الليزر فبدال ماتغطي الـLED 300متر هذا راح تغطي لك 600 مترفيعني تخيل سيارة وأنت ماشي في الظلام تغطي لك أكثر من نص كيلو إضاءة قدام طبعاً السيارة أربعة أنوار قدام الأربعة أنوار كلها تشتغل بكاميرات موجودة بوجه السيارة وموجودة برضوا بخلف المرايا الموجودة هنا تقراء الخط بحيث أنها ماتضايق الشخص اللي قدامك أو ماتضايق الشخص اللي جاي عكس إذا كنت في طريق رايح راد؛ شوف إضاءة الليزر. إذا إنك في دول كبيرة أو دول اللي مافيها إضاءة الليزر راح يفيدك بس مثلاً بالكويت الشوارع يعني ماشاء الله كلها فيها إنارة وبنفس الوقت الديرة صغيرة فما أعتقد إنك تحتاج تاخذ الليزر طبعاً أشلون تعرف الفرق بين الليزر والليد راح تلقى الليزر الأنوار الأمامية موجود عليهم زي التيوب أزرق لونه أزرق وبنفس الوقت مكتوب على الأنوار ليزر لايت. نتكلم عن الشكل الخارجي وجه السيارة متغير بالكامل الأنوار صارت متصلة مع الشبك اللي بالوسط

الشكل الخارجي 24/24 Outside

الأمامي 4/4 Front

الجنوط 4/4 Rims

جذابة 4/4 Attractive

الجانبي 4/4 Side

سهولة التوقيف 4/4 Easy to Park

الخلفي 4/4 Rear

الشبك صار كبير بشكل ملحوظ وأجمل بنفس الوقت صار فيه فتحات تفتح وتسكر حسب إحتياج السيارة وبنفس الوقت الشبك الأمامي كان بالبي إم الأول كان لما تفتح الكبوت يرتفع مع الكبوت لأنه مثبت في الكبوت الآن لا صار ثابت بوجه السيارة؛ يعني هذا ممكن يعطيك شوية أريح لما تفتح الكبوت إنك تقدر تشتغل على السيارة مع إني أعتقد ماراح تعرف أي شيء داخل السيارة لأنها كلها إليكترونية وراح نلاحظ أن السيارة فيها كروم بشكل رهيب من قدام من الجنب ومن ورا وبنفس الوقت من داخل؛ الشيء هذا يعطي السيارة جمال غير طبيعي خصوصاً لما تاخذ الألوان الغامقة أسود أو الكحلي جداً روعة بس يبيلك تحافظ عليه يعني في مناطق اللي فيها غبار زي الأجواء اللي في الخليج أنه إذا كان فيه عاج أو فيه غبار شيء تحاول إنك ما تمشي بسرعة أو إنك تأجل مشوارك؛ المرايا الموجودة صارت الآن محمولة على زي اليد اللي هي الألمنيوم فشكلها يعني جداً حلو وخلوها أبعد شوي من باب السيارة بحيث أنه يكون فيه مسافة أو مجال للهواء أنه يتحرك ويقلل نفس الشيء اللي هو إزعاج الهواء.

الرؤية من المرايا الجانبية للبي إم لازالت صغيرة بالرغم من حجم كبر المرايا. راح نلاحظ خصوصاً من برا الميله اللي تجي من السقف مع شنطة السيارة صارت مايلة أكثر من الشكل الأول وهذي علشان تعطي مجال داخل السيارة يعني أنها تكون أوسع السيارة من داخل؛ لما تربط الحزام وتمشي بالسيارة الحزام يسحب نفسه بحيث أنه يتثبت أكثر على الراكب أو السواق هذي ميزة السيفتي.

من الأشياء اللي جداً مهمة غيروها بالشكل هذا اللي هو فتحت الباب صارت أوسع من الشكل اللي قبل بحيث أنه شكل أول كان يعني لما تدخل أو تطلع راسك يضرب في المنطقة هذي فوسعوا المنطقة هذي بحيث إنك تقدر تطلع وتنزل براحتك. لما تفتح باب الـ700 راح تلقى أنه يوقف معاك بأي وضعية تخليه فيها الشيء هذا جداً مهم لما تكون في باركينغ ضيق أو في مجمعات عكس السيارات الثانية اللي تلقى فيها ممكن وضعيتين أو ثلاث وضعيات.

نتكلم الآن من الداخل من أول ماتركب تقول لي والله هذي نفس السبع مئة اللي قبلها ولكن مختلفة تماماً عن اللي قبلها 180درجة مختلفة عن اللي قبلها وراح نلقى أن العدادات عدادات كلاسيك اللي موجود في البي إم من زمان بس الآن صار تقريباً إليكتروني بس مازال محافظين على العدادات حط لك فيها فريمات اللي هي من الكروم أو الألمنيوم وصغير يعني جداً رياضي سبورت تحس السيارة يعني جداً شكلها روعة؛ الـsteering من أفضل الشركات اللي تصمم الدركسون والإستيلنغ والسكان بعد الفيراري للبي إم دبليو أجمل دركسون كشكل وكملمس أو كأحساس جداً روعة واللي مو مصدق يروح يجرب بنفسه؛ الشغلة الثالثة اللي هو السيستم اللي يتحكم بالسيارة من الداخل اللي يُسمى iDrive أفضل سيستم موجود بالماركت بجميع السيارات طبعاً هم سموه آي درايف من 2002 مع الموديلات 2002 اللي هي 700 اللي كان شكلها للأسف جداً سيئ وطوروا فيه الشاشة صارت عشرة وربع إنش تاتش وصارت يعني ذكية لدرجة إنك لمن تحاول تمد يدك عشان تقرب من الشاشة تلقى كأنها هي تقرب منك بالطريقة هذي فتلاحظ كأن الشاشة تقول لك ترى أنا عارفه أنك تبي تسوي تاتش؛ طبعاً الملمس جداً ممتاز روعة كأنها آي باد الـ idrive نفسه فيه اللي هي أزارير حاطينها لنا اللي هي المابز والميديا والنفيجيشن والإنترنت والأشياء هذي بنفس الوقت التاتش يعني تبي تكتب تكتب وفيه اللي يسمونه الكراكتر رجنيشن يعني تسوي Aراح تلقى قناة تكتبA وتعرف أن هذا A؛ النفجيشن الموجود في السيارة مربوط بالأنترنت وتقدر تشوف الشوارع اللي فيها زحمة والشوارع اللي مافيها زحمة بالإضافة التحديثات اللي بالنفجيشين تصير أونلاين لمدة ثلاث سنين مشمولة تقدر إنك تجددها بعد الثلاث سنين طبعاص فيها 20GB تخزن فيها مثلاً الأشياء اللي تسمعها؛ الساوند سيستم اللي موجود في البي إم 700 ستاندرد يصير 600 واط فيه الأعلى اللي هو يسمونه Bowers & Wilkins 1400 واط؛ السماعات راح تلاحظ أنه مغطاة بالألمنيوم وبنفس الوقت لمن تشغل السيستم فيها أنوار داخلية بالنسبة للموبايلز أو الجوال اللي تبي تركبه بالسيارة السيارة صار فيها اللي هو الويرلس تشارجينغ اللي هو الشحن عن بعد فراح تقدر تركب بس طبعاً يعتبر أوبشن يكون موجود هنا ( أيضاً يشحن مفتاح السيارة لاسلكياً ) تحط الجهاز ويشحن بدون أي أسلاك.

فيه USB وفيه الي هي NFC اللي هي تقدر تقترن بالسيارة بس بالبلوتوث إنك تحط الجهاز هنا السيارة تعرف أنه تبي تشبك مع السيارة؛ المكيف 700 من زمان 4zones اثنين قدام واثنين ورا طبعاً كل واحد منفصل بالمروحة بدرجة الحرارة اللي أبغاها -- سعر كراسي المساج والتبريد تقريباً 18,000 ريال سعودي 1,600 دينار كويتي -- وأضافوا إليه السنة هذي اللي هو عطور يعني السيارة راكب فيها عطرين تقدر تختار العطر اللي يناسبك ويشتغل تحدد أنت المدة اللي يشتغلها كم بخة أشياء جداً حلوة طبعاً موجودة في سيارات قديمة وسيارات رخيصة الستروين هذي الأشياء هذي الموجودة فيها من أول.

لوحة التكييف والعدادت اللي في النص صارت كلها تاتش والتحكم في فتحات التكييف اللي فوق صارت حوالين السينسر نفس الشيء صارت تاتش أول كانت باليد والآن صارت تاتش.

المواد المستخدمة داخلياً أو الماتيريل اللي تشوفه جلد جلد واللي تشوف خشب خشب واللي تشوفه ألمنيوم ألمنيوم واللي تشوفه كروم كروم مافي شغل اليابانيين والأمريكان اللي تشوفه خشب يطلع لك بلاستيك؛ السيارة هذي بالكامل جلد – خشب – ألمنيوم – كروم قمة الفخامة راح نلاحظ السقف حاطينه من اللي يسمونه الكانتارا أو بالعربي الشامواه يعطي فخامة للسيارة جداً روعة بس هو بالسيارة هذي فاتح لونه لما يكون أسود الفحمي يكون جداً أجمل.

في خدمة الكنسيرج موجودة في البي إم خدمة جداً روعة وعملية خصوصاً إذا إنك تسافر في السيارة طبعاً مثل ماقلنا هي مشبوكة بسيرفر بألمانيا طبعاً ماتدفع شيء أول ثلاث سنوات بعد الثلاث سنوات لازم إنك تجدد بس خدمة جداً روعة؛ السيارة فيها سيم كارت بحيث أنها إذا تحتاج سيرفس أو إذا فيه شيء خرب بالسيارة وألمانيا يشوفون المشكلة هذي ويحاولون أنه يحجزون لك موعد مع الوكالة طبعاً يتصلون فيك ويحددون موعد إن تسوي السيرفس أو لاسمح الله في حالة الحوادث خدمات نقدر نقول عليها خمس نجوم. نجرب الكونسيرج..... راح نلاحظ أرسلت لي اللوكيشن؛ خدمات يبيلك تتعود عليها لمن تتعود عليها راح تلقى نفسك بعدين بالنسبة لك شيء أساسي يعني الكثير بيقول لك لا ما أحتاج هذي يعني هذي شيء غير مهم بس لمن تتعود عليها بشكل يومي يعني تبغى مثلاً تبي مطعم سوشي أو تبي مطعم ماكدونلدز مثلاً مالك نفس أو مالك خلق إنك تروح تدور ومدري وشو بالحركة هذي كل شيء يصير أونلاين طبعاً اللي يردون عليك أحياناً يصيرون عرب وأحياناً يصيرون بلغة إنجليزية بس اللي مايتكلم إنجليزي وردت عليه وحده ممكن أنه يطلب شخص أنه يتكلم معاك عربي فهم حريصين ومهتمين بالأشياء هذي.

لمن ترجع للخلف تقدر إنك تتحكم بالكاميرا 360درجة تقدر تشوف الجهة الأمامية؛ تقدر تشوف جهة اليمين؛ الجهة الجانبية؛ من ورا؛ جهة السواق. من الشياء اللي تبين لك إهتمام البي إم بتطوير أدق التفاصيل بالسبع مئة الجديد راح نلقى الآن بمجرد لمس أزارير التحكم بالكراسي راح يبين معاك بالشاشة الوضعيات اللي راح تحرك عليها الـseat.

السبع مئة مليانة أوبشنز ومواصفات أغلبها تجي ستاندرد بالنسبة للسيفتي وكلهم يتفعلون بزر واحد اللي هو الزر الأخضر؛ السيارة تتحكم تقريباً بنفسها إلى حد ما يعني السيستمز اللي موجودة إذا شافت إنك راح تصدم أو شيء راح تمسك بريك إذا شافت مثلاً إنك تطلع من المسار اللي أنت ماشي فيه راح تعطيك تنبيه إذا شافت إنك طنشت ويدك ماهي على الدركسون راح تحاول أنها ترجعك للطريق الصحيح

سعر هذا الطلب تقريباً safety systems

18,000ريال سعودي

1600 دينار كويتي

طبعاً تلغي الشيء هذا بالإشارة يعني إذا بتلف يمين إذا دقيت الإشارة السكان أو الدركسون راح يسوي فايبريشن. إذا والله لا لفيت يعني مثلاً بسوي الآن بلف السيارة رجعت نفسها يعني السيارة ذكاء رهيب وتقدر أنه يعني مثلاً اللي قدامك الآن رجعت نفسها إذا أنك تصدم في الشخص اللي قدامك تنبهك بدري بعدين هي من نفسها تمسك بريك؛ طبعاً فيها كاميرا قدام اللي هي night vision

سعر هذا الطلب night vision

11,000ريال سعودي

1,000 دينار كويتي

تشوف الناس اللي يعني لاسمح الله فيه أحد بيمشي قبل ماتصدم فيه تعطيك تنبيه وبنفس الوقت ممكن هي تمسك بريك. السيارة تقراء الخطوط تسوي فايبريشن وترجع نفسها بنفسها.

الكروز كنترول متطور بشكل رهيب بالسيارة يعني إنك تقدر إنك تفعله عن طريق الدركسون أو السكان وتقدر تتحكم بمسافة السيارة بين سيارتك وبين سيارة اللي قدام السيستم يقراء ويشوف السيارات اللي هي حواليك سواء كانت قدام أو على اليمين أو اليسار أو ورا بالرادارات ويعطيك كل التعليمات بالشاشة اللي موجودة قدامك ويعطيك إياها بالـ head up display أو اللي هو البروجيكتر ويتدخل بالدركسون يعني تلقى الفايبريشن شغال وإذا حست السيارة أنها شوي ماهي مرتاحة للوضع تبداء تعطيك إشارات تحط إيدك على الدركسون وكمل سواقه. الإضاءة اللي شفناها بالـ x6 موجودة حالياً بالسبع مئة تقدر إنك تغير الإضاءة بالأشكال والألوان اللي تبيهم قدام وورا بس دخلوا شيء جديد اللي يسمونه سكاي لونج تجي على اللارج أو اللونغ الطويلة السيارة الطويلة يصير عليها فتحة البانوراما فيها إضاءات صغيرة

سعر هذا الطلب panorama sky lounge

5000ريال سعودي

420 دينار كويتي

يعني حسب كلامهم فيها 15,000 لمبة صغيرة اللمبات هذي يتغير لونهم مع الألوان اللي أنت تختارهم داخل السيارة فشكلها جداً يعني جداً روعة خصوصاً بالليل؛ بالنهار ماراح تشوف شيء.

فيه أوبشن اللي هو executive lounge تصير في الجهة الخلفية

سعر هذا الطلب تقريباً Rear Executive Lounge

28,000ريال سعودي

2500 دينار كويتي

تعطيك وضعيات حركات أكثر للـseat اللي خلف الراكب الأمامي اللي هو السيت بالجهة اليمين اللي ورا بحيث أنه الكرسي اللي قدام يتقدم وينزل الراس ويصير فيه أماكن للرجول. نجي الآن الكراسي اللي ورا راح نلقى السيارة ماشاء الله طبعاً الفيرجن اللي موجود اللي هي LI تكون ماشاء الله الكراسي اللي ورا واسعة؛ هذي الشاشة الجديدة اللي ركبتها البي إم بالـ700 الجديد كأول سيارة يكون فيها شاشة متحركة أو نقول تابليت 7إنش تقدر تشغلها من هنا وبنفس الوقت تقدر تتحكم فيها وهي مكانها أو إذا تقدر تضغط الزر هذا وتطلع لك الآيباد أو التابليت راح نلاحظ إنك تقدر تتحكم بالإضاء الداخلية تقدر تتحكم بواقيات الشمس أو الستائر الموجودة بالسيارة تقدر تتحكم بالكراسي تقدر تتحكم بالتكييف بالسي دي الديفيدي الريديو معلومات السيارة إعدادت ونفس الوقت إذا فيه أبلكيشنز بتنزلهم من الستور؛ الإضاءة تقدر تتحكم بالسيارة من الداخل فيه إضاءة جديدة ركبتها البي إم بالمنطقة هذي جداً روعة طبعاً تقدر تطفيها وتشغلها تاتش كل الإضاءة الي بالسيارة Led تقدر تتحكم بقوة وضعف الإضاءة اللي داخل.

عندك المقاعد تختار المقعد اللي تحتاج مثلاً أبي المقعد اللي قدام بيحركه قدام؛ الكرسي اللي أنا فيه أقدر أني أرفع اللي قدام وانزله أخلّي الكرسي يصير منسدح هذا أقصى حد؛ أقدر أخليه يقدّم؛ أخليه يرجع ورا؛ الأكتاف؛ منفاخ الظهر سواء فوق ترفعه فوق أو تنزله تحت أو تنفخه زيادة أو تنفخه أقل وتحكم مسكة الرأس أو مسند الرأس ترفعها وتنزلها؛ تقدر إنك تخزن المقعد أو إعدادات المقعد اللي أنت تبيها.

أنا ضغطت الآن اللي هو الوضع الأساسي للسيارة اللي هو الأستاندرد بدال ماتدور وين المقعد أو الوضعية الصحيحة حقت المقعد تضغط على العلامة هذي وراح توريك المقعد الأساسي.

فيه المساج اللي عندك تحريك الحوض؛ تحريك الجزء العلوي للجسم؛ تحريك الجسم بالكامل؛ تدليك الظهر؛ تدليك الكتف؛ تدليك أسفل الظهر؛ تمرين الجزء العلوي للجسم؛ تمرين الجسم كامل.

الأزارير الموجودة على الباب اللي هي ميموري واحد واثنين وعندك المساج؛ الآن بديت ألاحظ المساج تحت وفوق بالظهر فعلاً الكرسي كله يتحرك يذكرني إذا رحت المجمعات راح تشوف الكراسي اللي يقول لك كومفورت ومن هالكلام نفس الإحساس اللي هناك هنا بس هذا شوي يعني تحسه أفضل من الكراسي الصينية اللي موجودة بالسوق؛ كراسي البي إم معروف البي إم أنه يصنوع كراسيهم يعني على أيدي أطباء أطباء العلاج الطبيعي وأطباء المساج فتلقاهم مهتمين بأدق التفاصيل يعني تقدر إنك تخلّي الكرسي واسع وتقدر تخليه يكون ضيق من فوق من تحت تقدر تخلّي الكرسي يكون يعني بحيث مثلاً يساعدك على الـ curves يصير لك زي اللم هذي تلقاها غالباً موجودة في سيارات الـ M علشان تحس إنك ثابت في الكرسي وبنفس الوقت تكون مريحة فكراسي البي إم من أفضل الكراسي اللي موجودة بالسيارات؛ نخلّي المساج وهو شغال التكييف أقدر أتحكم بدرجة حرارة التكييف الكرسي اللي أنا موجود فيه تهوية الكرسي أقدر أخليها عالية وسط أو خفيفة أقدر أخليها تسخين؛ العلامة هذي إذا تبغى التسخين يكون أسفل للظهر أو تبيه يكون للمقعد ودرجة الحرارة اللي موجودة بالسيارة تقدر تتحكم فيها من المنطقة هذي راح نسمع أن المكيف بداء يشتغل طبعاً تتحكم بهنا والجهة الثانية وتقدر تطفي المكيف؛ تقدر تتحكم بالفلتر حق التكييف بحث أنه مايدخل لك الهواء اللي فيه روائح ماهي زينه من برا وبنفس الوقت اللي هي قاتل البكتيرياء والأشياء هذي؛ نفس الشيء راح نلقى العطور اللي صارت الآن موجودة بالسبع مئة هذي طريقة البخ. الآن نج لنظام الوسائط والأستريو طبعاً تقدر إنك السيارة فيها ديفيدي وفيها سماعات وايرلس تقدر تشوف عندك الشاشة هذي طبعاً الشاشة هذي شوي نوعاً ما ثقيلة هي طبعاً سامسونج؛ معلومات القيادة يبين لك المكان اللي أنت فيه أختار الشاشة اللي على اليمين تقدر تتحكم بالشاشة اللي هنا وايرلس عن طريق الآيباد نافيجيشن إخال العنوان؛ خريطة؛ مينيو؛ إعدادات المركبة؛ إعدادات معلومات القيادة؛ إعدادات النظام؛ سماعة؛ لغة؛ طبعاً شوي العربي بالمفتاح أنا لاحظت أنه بيعطيك الحروف مقلوبة فممكن الأنجليزي يكون أسهل؛ عملت ريستارت علشان غيرت اللانغويج بدأت تتحرك ألحين نقدر نقفلهم نسكر كل الفتحات اللي موجودة بالسيارة؛ الإعدادات طبعاً الإعدادات اللي هي إعدادات الآيباد أو التابليت والتابليت طبعاً أندرويد؛ عندك أبليكيشنز تستخدمها ممكن تنزل الظاهر أنا أول واحد يسوي الإعدادات راح نلقى أنه آندرويد وهذي الأبليكيشن حقت السيارة أشتغلت معانا؛ لما ترجع التابليت راح تلقى أنه فيه المنطقة هذي راح تسكر عليهم بحيث أنه تكون ثابتة.

بالكراسي اللي ورا السيارة تتمنى إنك ماتنزل من السيارة هذي لكن الشخص اللي بيسوق السيارة دائماً أنا شخصياً أفضل أنه يطلب له الشورت فيرجن اللي هي مثلاً 750i لأنه الأشياء اللي ورا هذي تزيد لك وزن وتطول السيارة وقليل ونادراً ماراح تستخدمها يعني أنا أذكر مرة من المرات شريت لي وحده من اللينغ فيرجن السيارة تقريباً صار لها كم سنة أربعة أو خمسة سنين مع صاحبها الكراسي اللي ورا بقراطيسها يعني حتى الطاولات اللي موجودة بقراطيسها

الداخلية 24/24 Interior

التصميم 4/4 Design

الجودة 4/4 Quality

التكنولوجيا 4/4 Technology

عداد السرعة 4/4 Odometer

عملية 4/4 Practical رائحة الجلد 4/4 Leather Smell

إذا ما ارح تركب ورا أو إذا ماعندك أحد راح يركب ورا أو ما عندك سواق يوديك ويجيبك يعني الأفضل إنك تاخذ الـ 750i أو الـ 740i اللي هي الشورت طبعاً أدري الوكالة راح يقول لك أنها ماهي موجودة أو مانجيبها أو مانوفرها أطلبها المفروض أنه هم يجيبونها على المواصفات اللي أنت تبيها.

سيارة بزنس مثل الـ 700 اللي موجودة عندنا اليوم تتوقع الدبه الخلفية أو الشنظة الخلفية تكون واسعة الكلام هذا فعلاً صحيح فتحة الدبه والشنطة واسعة؛ الشنطة من داخل عريضة وطويلة تقدر تركب فيها أشياء كبيرة ولكن إذا طلبت على سيارة الكفر أو التاير الإحتياطي راح تلقى أنه ياخذ تقريباً 10سم من أرضية الشنطة وفعلاً يصغر حجم الشنطة؛ الحقيقة أول مرة أشوف سيارة يأثر عليها الكفر الإحتياطي بهذا الشكل.

الـ700 الجديد ينزل بباكجيز مختلفة ينزل ستاندرد وينزل اللي عليه M sport

سعر هذا الطلب تقريباً M sport pkg

25,000ريال سعودي

2,200 دينار كويتي

وفيه البيور إكسلينس زي اللي موجودة معنا اليوم وينزل بعد اللي هو الأنديفيجول

سعر هذا الطلب تقريباً BMW Individual

42,000ريال سعودي

3,700 دينار كويتي

له ألوان مميزة وله جلود مميزة وفيه الـ signature لكل سيارة تلقاها موجودة بالأبواب وعلى جوانب السيارة بالـ seats.

لما رحت الوكالة وشفت الإم سبورت باكيج معروض مقابل البيور إكسلينس تغيرت وجهة نظري بالنسبة للإم سبورت فعلاً أجمل وأحلى من اللي موجود بالصور.

من أجمل الـ head up display اللي موجودة بسيارات اليوم اللي هو الموجود بالبي إم تحس أنه ورا الكبوت مع أنه بالقزازة بس يعطيك إنطباع كأنه على بعد مترين تحسه 3D كبير وواضح وألوان وفيه الإشارات اللي موجودة بالشوارع يعني إذا فيه سرعة سرعة 80 بالشارع الكاميرا اللي قدام تقراء وتعطيك أنه فعلاً السرعة موجودة بالشارع هذا 80.

نافيجيشن بالهيد أب ديسبلاي بروجيكتر عجيب؛ الموديلز اللي تنزل بالخليج 730 إلى الآن طبعاً مانزلت بالكويت بس موجودة بدول الخليج عليها الأربعة سلندر Twin Turbo ( 730i 730Li 4cylinder Twin Power Turbo 2.0L 258hp 400NM 0-100 730i 6.2s 730Li 6.3s ) 258 حصان؛ العزم400؛ التسارع من صفر إلى مئة ×6.3 وفيه الـ740 اللي هو مكينته اللي هي in line 6سلندر اللي هي 6سلندرات ورا بعض

740i 740Li TwinPower Turbo inline 6-cylinder 3.0L 326hp 450Nm 0-100 5.6s 26 حصان والعزم 450 والتسارع 5.6s؛ 750 ينزل منها اللي هي الدفع الخلفي والدفع الرباعي 8 سلندر توين تيربو 4.4 450 حصان و 650 نيوتن متر اللي هو العزم؛ تسارع الدفع الخلفي 4.7 والإكس درايف اللي هو الدفع الرباعي 4.5.

صوت الشكمان8/2 Exhaust

حال الوقوف 4/1 Idle

حال التسارع 4/1 under Acceleration

مربوط مع جير فيهم كلهم ثابت اللي هو 8 سرعات طبعاً الجير مرتبط مع النافيجيشن فالسيارة تقراء من النافيجيشن إذا إنك ماشي على قدامك راح يوصل كيلو أو إنك راح توصل إشارة أو أنه راح يصير فيه تقاطع فتجهز الجير اللي راح الجاي فكأنها تقريباً نوعاً ما شبه دبل كلتش.

لمن نتكلم عن الـ performance وعن الأداء معناته لازم نتكلم البريكس؛ البريكس والفرامل بالـ700 فرامل سيارة رياضية؛ القيادة العادية الإحساس طبيعي ممتاز في حالة الخطر أو في حالة الطواريء راح تلقى السيارة ثابته متزنه وإحساس الفرامل جداً ممتاز

حجم دسكات الفرامل Disk Brakes 750

أمامي 374mm Front

خلفي Rear 370mm

730 -740

أمامي 348mm Front

خلفي 345mm Rear

الدسكات في الـ 730 والـ 740 نفس الحجم لمن تطلع في الـ750 الدسكات راح تكون أكبر؛ الجنوط والرنقات 19 – 20 – 21 ؛ الـ20 و 21 الأحجام الكفرات اللي قدام والتواير 245؛ الخلفية 275. ولن تكتمل مجموعة الـ700 الجديد بدون وجود 760 اللي 12 سلندر؛ الآن صارت تحمل البادج M performance إنجين جديد 6.6L ؛ 600 حصان 590 نيوتن متر العزم؛ التسارع من صفر إلى 100 في 4 ثواني تقريباً والسرعة القصوى فوق 300 كيلو متر بالساعة.

إذا فيه أحد راح يسألني أي موديل بالـ700 راح آخذه أقول له أكيد الـ Alpena B7 الجديد by Turbo 8سلندر 4.4 - 608 حصان والعزم 800 نيوتن متر وتسارعها من 0 إلى 100 في 3.7s؛ السرعة القصوى 310؛ البريكات والدسكات الأمامية 395؛ الخلفية 370 ؛ الجنوط 20-21؛ التواير والكفرات اللي قدام 255؛ الخلفية 295.

أجمل 700 ممكن تشتريه وراح تكون حتى بالمستقبل من السيارات اللي الكل يتمنى يقتنيها وراح تكون بأعداد محدودة على مستوى العالم؛ طبعاً سعرها أكيد راح يكون عالي ولكن أفضلها بكثير على 760.

التحكم بوضعية القيادة يسمونها driving experience موجود هنا يصير adaptive والأدابتيف هذا أفضل وضعية لأنها تقراء حركات السواق ردة فعله مع السكان مسكة البريك دعسة البنزين بنفس الوقت مربوط مع النافيجيشن بالأقمار الصناعية يعني تشوف إذا الطريق اللي أنت فيه هل هو يحتاج تكون السيارة ناعمة الـ suspension حقها ناعم إذا السيارة تحتاج مثلاً إنها تكون رياضية إذا أنك داخل على كيرف يعني السيارة تفكر معك؛ الأدابتيف أفضل واحد فيهم إذا تبغى تخلّي السيارة دائماً سبورت طبعاً راح تحرك معاك الشاشات راح تتغير تصير رياضية أكثر والرسبونس يصير جداً عالي بالسيارة وفيه الكمفورت السيارة تصير هادئة مُريحة وفيه الإيكو اللي هو يشتغل معاك إلى سرعة 120 وهذا يوفر بالبنزين طبعاً هو يوفر يعني هذي محسوبه بأوروبا وهناك لأن البنزين عندهم يعتبر يعني غالية بشكل رهيب. ولأول مرة الـ700 ينزلون لك اللي هو air suspension اللي يتحكم بإرتفاع ونزول السيارة يصير ستاندرد على الـ700 يرفع السيارة تقريباً 2سم إذا تحتاجها بنفس الوقت ينزل السيارة 1سم بعد الـ 120 هذا يساعد السيارة على الثبات؛ من أهم الأشياء اللي بالفورمنس اللي هو طريقة تحكم السيارة بالهواء اللي برا فشغالين عليها زي مافيراري وبورش يشتغلون على سياراتهم. الآن فتحت الشبك الأمامي لمن المكينة تحتاج هواء تفتح وإذا ماتحتاج هواء تسكر عشان مايصير فيه مقاومة للهواء؛ الفتحات اللي كانت في قدام الكفرات الأمامية والتواير زي ماكانت موجودة في الفئات القديمة موجودة حالياً بس أضافوا فتحات بعد التواير أو الكفرات بحيث أن الهواء اللي يطلع من هناك يرجع يدخل مرة ثانية فما يسوي اللي هو يسمونه air turbulence أضف إلى ذلك الكفرات أو الجنوط اللي موجودة بـ700 تصميمها يعني إنسيابي بنفس الوقت بحيث أنها ماتسبب برضوا لفة دوران لفة أو دوران بالهواء يحاولون يخلون الهواء يمشي يعني من قدام ومن فوق ومن تحت ومن جوانب السيارة بشكل يعني غير طبيعي؛ الشبك اللي تحت المنطقة السفلية فيها طبعاً ثلاث فتحات منفصلة الفتحة اللي في النص تحاول انها تمشي الهواء من تحت السيارة. الوزن يلعب دور كبير في أشياء كثير ( أداء السيارة؛ توازن السيارة؛ ثبات السيارة معدل صرفية البنزين)؛ الكاربون فايبر اللي بيشتغلوا فيه على السيارة نزل وزنها تقريباً 130 كيلو عن الموديل اللي قبلها 130 كيلو يعني يتكلم على راكبين وخلا السيارة يعني تحافظ على التوازن اللي هو 50 قدام و50 ورا 50% قدام و50% ورا اللي هو signature حقي البي إم ونزل بنفس الوقت اللي هو يسمونه center of gravity مدري أشلون أقولها بالعربي بس اللي هو متوسط جاذبية السيارة صار الآن نازل يعني حتى الإكسسوارات اللي حطوها في الـ700 راح تلقى سواء كانت داخلية أو خارجية يحاولون أنها تكون أنزل أكبر قدر ممكن بحيث أن السيارة تكون السينتر أوف جرافيتي تكون نازلة؛ وزن السيارة هذي اللي ماشاء الله طويلة عريضة وكل هالجلد كل هالأوبشنز اللي فيها يعني قريب من النيسان GTR يعني تخيل نيسان جي تي آر سيارة سبورت بابين بينما هذي سيارة بزنس كلاس يعني أشلون وصلوا إلى الوزن هذا يعني إنجاز رهيب؛ وزن الإكس درايف 750Li اللي موجودة معنا اليوم 1990 يعني أقل من 2طن إنجاز غير طبيعي؛ طبعاً اللي الدفع خلفي أخف من هذي بـ50 كيلو وفيه الـ740 اللارج وزنها تقريباً 1850كيلو جرام أوزان يعني جداً خفيفة والشيء هذا نفس الشيء راح تلاحظه لمن تركب السيارة وتمشي فيها وتروح يعني إنجاز غير طبيعي .

الـ suspension في السيارة أفضل سيسبينشن موجود بالماركت مثل مايقولون يعني لما تبغاه سبورت سبورت لمن تبغاه يكون مُريح مُريح وإستجابة السيارة يعني غير طبيعية يعني إحنا ماشيين الآن بطريق يعني مكسر وحالته حالة بس السيارة فيها الكاميرات اللي تقراء الطريق نفس الكاميرات اللي شفناها في المرسيدس واللي الكل علّق عليها اللي هي قالوا أنها أخذناها من حركة رأس الدجاجة مهما نحرك جسم الدجاجة الرأس يكون ثابت؛ البي إم ماتفلسفوا الفلسفة اللي قالتها المرسيدس السيسبينشن من التسعينات من أفضل السيستم للسيسبينشنز اللي هو موجودة بالعالم يعني الـ700 لمن تركب 700 تحس إنك فعلاً راكب سيارة تحترمك كراكب وتحترم الفلوس اللي حطيتها فيها؛ الـ Executive Pro اللي تطلبه هذا راح يخلي لك السيارة يعني تكون أريح وتقراء الطريق أكثر بحيث أنها تحافظ على راحة الركاب اللي يكونون ورا وهذي يُفظل للسيارات اللي يستخدمونها كليموزين أو الشخص اللي يكون عنده سواق. حركة الدركسون طبعاً الدركسون كهربائي ماهو هيدروليك هم حولوا الكهربائي توفير للطاقة وتوفير للبنزين لمن تمشي بطريق مستقيم اللي يسمونه الجلينيتر أو الماطور حق الدركسون مايشتغل بس مجرد إنك تحرك الدركسون يمين أو يسار يشتغل مع الدركسون فهذا يوفر في الطاقة؛ الفيلينغ طبعاً السيارة الدركسون حقها أقدر أقول لك البي إم الدركسون حقها يصغر السيارة يعني هذي سيارة كبيرة 750Li سيارة طويلة وعريضة لمن تركب مكان السواق وتلمس الدركسون أو السكان وتحرك تلقى إنك راكب سيارة سبورت يعني أنا حاطها على على adaptive الكنترول عجيب السيارة طبعاً مافيها الرولينغ هذا برضوا من الأشياء الحلوة بالبي إم السيارة ماتلعب.

وضعية القيادة أو وضعية السواق بالـ700 وضعية سيارة رياضية سبورت

الأداء 28/26 performance

الوزن 4/3 weight

استجابة المحرك 4/4 engine response

الفرامل 4/4 brakes

التسارع 4/3 acceleration

الجير 4/4 gear

الشيء هذا ممكن يكون كثير من الناس يكون شيء مايسوى أو شيء عادي بس هم مهتمين فيه لدرجة أنه يقولوا لك لا إحنا سيارتنا سيارة سبورت.

دخلّوا على السيارة الشيء اللي هو 4 wheel steering يعني الكفرات اللي ورا تلف مع الكفرات اللي قدام طبعاً السيارة لاحظت الآن أني بغيت أصدم بالسيارة الي قدامي فصارت تعطيني تحذير وصار فيه هزاز فيبريشن بالدركسون ولو ما أنتبهت السيارة راح تمسك بريك؛ الكفرات اللي ورا على السرعات الخفيفة تتحرك عكس الكفرات اللي قدام فتبين لك أن السيارة قصيرة شورت فلفتها بالباركينغ تكون حلوة على السرعات العالية تمشي موازية للكفرات اللي قدام فكأن السيارة طويلة بزيادة تكون راسية ثابتة؛ الإكس درايف السيستم اللي شفناه بـ X5 بـ X6 من أفضل السيستمز اللي موجودة تحافظ على توازن السيارة ولكن ماهو معناته إنك تطلع فيها بر سيستم start/stop جداً روعة ممتاز يطفى في الوقت المناسب ويشتغل في الوقت المناسب وما تحس إن السيارة فيها الهيزيتيشن أو اللي تصير متردةة السيارة جداً ممتاز عندك لما تمسك بريك تشحن البطاريات اللي موجودة في السيارة هذي خدمة جداً ممتازة؛ الـ coasting موجود بالسيارة اللي يفصل الجير عن المكينة؛ لما ترفع رجلك عن البنزين فرامل السيارة ماشية براحتها طبعاً إلى 160 كيلو متر في الساعة

اسعار قطع الغيار التقريبية 750Li (Est) Spare Part Prices

الشمعة الأمامية ليزر واحد Lazer headlight (1) 19,000 ريال سعودي – 1509 دينار كويتي

الصدامات Bumbers أمامي Front ( 4,200 ريال سعودي – 338 دينار كويتي )

خلفي Rear ( 4,000 ريال سعودي – 321 دينار كويتي )

المساعدات الهوائية Air Suspension أمامي (1) Front (6,000 ريال سعودي – 472 دينار كويتي )

خلفي (1) Rear (9,600 ريال سعودي – 767 دينار كويتي )

فحمات الفرامل Brake Pads أمامي Front ( 1,500 ريال سعودي – 124 دينار كويتي )

خلفي Rear (600 ريال سعودي – 50 دينار كويتي )

هذا يوفر بنزين في نفس الوقت يريح السواق ما أنه يقعد يدوس بنزين على طول الوقت.

فيه سيستم يسمونه route ahead assistance system السيستم هذا يستخدم الجي بي إس فيعطيك خبر إذ أنك ماشي يقول لك ترى فيه قدامك يه لفة أو أنه فيه قدامك ترى فيه تقاطع أو الطريق اللي قدامك فيه حفريات او فيه تحويلة طبعاً يقراها عن طريق اللي يسمونها traffic الأبديت اللي على طول أو مربوطة على طول مع الجي بي إس ومربوطة برضوا مع الأنترنت.

طيب السيارة طول الويكيند رحنا جربتها طلعت نزلت نمت فيها سوينا مساج السيارة يعني فيرست كلاس واء داخل المدينة أو مسافر فيها أو بتداوم فيها كنت تسوق أو أحد يسوق فيك السيارة يعني ماعليها أي كلام؛ ضمان الوكالة 2 سنتين المصنع زائد 3 سنين اللي هو من الوكالة نفسها تمديد بس طبعاً مايشمل كل شيء يبيلك تتأكد وش اللي مكتوب بالكتالوج أو بالبروشور الله يعينك الشيء الثاني السيرفس 3 سنين أو 84,000 كيلو طبعاً ماعدا اللي هي البريك بادز السفايف الفحمات أو دسكات الفرامل هذي ماهي مشمولة طبعاً الكفرات والتواير مو مشمولة السعودية الضمان يمكن شوي أفضل طبعاً الضمان أنا قلت 2 سنتين وكالة و 3 سنين اللي هو محلّي أو 150000 كيلو.

الضمان بالسعودية 5 سنوات أو 200,000 كيلو؛ السيرفس 100,000 أو 5 سنوات شامل كل شيء. أسعارهم الـ 730 بالسعودية تبداء من 367,000 ألف ريال؛ الـ 740 طبعاً مافي إلا اللارج فالـ 740 تبداء من 93,000 ألف دينار والـ 750 تبداء من 49,000 دينار؛ طبعاً إذا بنحسبهم بالريال تبداء الـ 740 تبداء تقريباً من 700,000 ريال سعودي والـ 750 تبداء من 625,000 ريال تقريباً.

التقييم النهائي Final Score 88/100

اتمنى الحلقة هذي قدرت أني أفيدكم بالسيارة هذي صراحة أنه ويكيند لقيته جداً قليل على السيارة يعني فيها فيتشر كثير بالهبل فعلاً اللي بيتشري السيارة لازم أنه يتعلم وش اللي موجود في السيارة؛ من الأشياء اللي كانت مضحكة اللي يعني يشرف أو اللي قاعد يعطيك التعليمات ويشرح لك السيارة للأسف أنه قاعد يضم معلومات غلط وخطاء وهذا وهذا الشيء اللي أنا أحاول أقلله أن الناس تصير فيه غلط بالمعلومات أو أنها تصلها معلومات غلط قال لك أيش قالك الكاميرا موجودة في السقف حقت الشاشة بينما السينسر موجود بالطبلون أو بالعداد وغيرها وغيرها فأتمنى اللي بيشتري سيارة انه يقراء عنها بشكل كامل.

كلمة أخيرة قبل ما أختم الحلقة.. الـ BMW الـ700 اللارج سيارة بزنس مان يعني أرجوا أنها ماتبناع على حريم وعلى نساء حرام تنباع لهم سيارة طويلة عابلون فيها بالمجمعات وبالأسواق.

يعطيكم العافية أتمنى إني أفدتكم بأكبر قدر ممكن عن سيارة الـ 700 الجديدة ولا تروحون راح أوريكم الآن ديمو أشلون حاولت أني أوقف السيارة عن طريق سيستم اللي هو أوتو أسست في أمان الله. الآن راح نجرب كيف نصفط السيارة أو نخلّي السيارة تصفط نفسها نروح للزر هذا وبعدين نروح للشاشة نختار بارك أسست وبعدين تمشي بشكل طبيعي نشوف السيارة شافت أكثر من باركينغ أو مطنشة يلا طنشتنا طيب نسوي مرة ثانية عشان تفعل خدمة الباركينغ أسست تضغط زر الـ B وتفتح الشاشة تروح يسار تتأكد أن أول وحده ونختار اللي يسمونها البارك أسست بعدين تمشي السيارة تقول وقف دق إشارة للباركينغ بعدين أضغط سينسر السيارة تمشي لحالها السيارة قاعده تمشي بروحها.

البارك أسست تضغط زر الـ P اللي هو حق الباركينغ وتختار أول أوبشن اللي هو البارك أسست السيارة المفروض توقف بنفسها الآن قاعده تشوف المواقف اللي على اليمين وعلى اليسار إذا شافت شيء المفروض تعطيني خبر خل توقف الآن قاعده تقراء الباركينغ دق إشارة تختار نوع الباركينغ بعدين تضغط زر الباركينغ اللي هو زر السينسر تخليك ضاغط عليه السيارة توقف من نفسها إن شاء الله ماركبت الرصيف يعني ماهي عملية نهائياً كانت المواقف فاضية ودقت بالرصيف مرتين.

شكراً للمتابعة وشكر خاص لوكالة الكويت والسعودية.

Tags:

ـجربة مفصلة