تجربة مرسيديس إس ٥٠٠ كوبيه
|
تجربة مرسديس إس 500 كوبيه
مبروك للأخ أحمد السيد فُزت بطقم كفرات مجاناً من السادة مجموعة العمودي القابضة وكلاء كفرات تويو نيكسون حصرياً في المملكة مبروك عليك أنت الفائز وإن شاء الله يتصلوا بك الجماعة وتصلك الكفرات حقك.
السلام عليكم ورحمة الله وبركاته اليوم معانا تجربة يعني تُحفة فنية مابدي أقول سيارة يعني حاجة رائعة كذا فخليكم معانا؛ إن شاء الله اليوم الـ إس كوب 500 فورماتيك موديلها 2015 أو ماكان يُسمى سابقاً بالسي ال هذي الشكل الجديد منها خليكم معانا في تجربة اليوم إن شاء الله. الآن طبعا ًالوحش هذا يعني فعلاً لما يقولوا Beauty in the best عادة كنت أقول بيوتي السيارة وبيست هنا هذي كلها على بعضها بيوتي إن ذا بيست جميل الوحش؛ السيارة هذي طبعاً طول 5,30متر ماشاء الله فارعة الطول على سيارة كوب وعندكم الله يسلمكم طبعاً كلمة كوب بالفرنساوي شيء مقصوص فلما تسمع كلمة كوب كوب ديتاو وحاجات زي كذا اللي هي ليها عدة مسميات جاية مصطلح منها بس هي جاية من الشيء المقصوص فهي هي يعني كلمة كوب يعني كانت أربعة أبواب وقصوها وصارت بابين فهذي كلمة كوب.. الشاهد 5,30 متر – 1,90متر – 1,41 متر الارتفاع – الوزن 1,90طن هي للمرة الأولى في الفئة هذي نزلوها الفورماتيك موجودة في مرسيدس من زمان الفورماتيك بس لأول مرة بينزلوها على السيارة هذي وعندكم الله يسلمكم الماكينة 8سلندر 4700 سي سي 455 حصان التسارع بيوصل في المئة 4 ثواني و 6 من 10 والعزم 700 نيوتن متر؛ ترى أنا مابدي أعيد كثير في المعلومات فيه كانت التجربة حقت الأخ أسامة سمنودي مرسيدس الـ إس500 نفس الأداء ونفس كل شيء اللهم هنا يكون الفرق شعرة حق أنه السيارة وزنها أخف نفس المواصفات من جوا الفخامة فيعني أحاول أخلّي لكم الفيديو ذا قصير وراح نشبك لكم الفيدي مع الثاني عشان تشوفوهم مع بعض.
طبعاً الكفرات جاية لقدام 245 – 40 – 20 اللي ورا 275/ 35 اللي هو 20 وطبعاً كمان حابب ألفت إنتباهكم أن هذي السيارة ماهي المقصود أنها تكون السيارة رياضية بحتة ومع ذلك شوفوا الذكاء ويعني الصناعة البروفيشنال المحترمة الجنوط كلها مخرمة علشان عملية التبريد السيارة وزنها 2 طن وكسور عندكم تشوفوا الهوبات من جوا مخرمة كمان هذي زي ماقلنا عليها ديسكات الفرامل الهوبات تكون مخرمة يسموها الكروس دريل لما مخرمة بالطول ومخرمة بالعرض فأيش يسموها أو أيش الفائدة من الكروس ديرل هذي الله يسلمكم حرارة أقل 40% فرملة أكثر 20% ولاحظوا حجم الكليبرات حقت الفرامل شوفوا قد أيش حجمها ماشاء الله ورا وقدام حاجة حجم مفتخر اللي أستغربت لهم عادة أنا عارف المرسيدس ماشاء الله تلاقوا الكفرات كمان تلنت الألمانية, بريل الأيطالية أو ميشلن بصراحة أول مرة أشوف كفرات أمريكية جودير حاطين عليها أكيد عملوا لها مجموعة إختبارات ونجح معاهم في الإختبار لأنه أحياناً المصانع علشان تنزل طقم كفرات معين يختاروه يمكن يخشوا في 23 طقم من المصانع بشكل معين ألين يختاروا واحد اللي يناسب الأهداف اللي هم حاطينها من ناحية التماسك ومن ناحية الهداوة أو من ناحية صرف بنزين اقل ألخ ألخ ألخ.
طبعاً ماشاء الله هذا الجنط الأمامي شوفوا قد أيش حجم الكليفر بس أنا حابب أوريكم فيه بعض الأشياء المعينة الناس ممكن ماتنتبه لها إلا إذا غاوي السيارات بيترول هيدرل شوفوا من فين لغاية فين هذا بس وطبعاً كمان حجم الهوبات أكبر نفس حكاية الكروس درل تجي مخرمة من قدام وبالعرض بس بوريكم قد أيش إحتمال في حكاية الفرملة والسلامة.
طبعاً مابدي أتكلم بصراحة عن الجمال يعني أعتثد أي نعم الجمال حاجة نسبية بس واضحة تماماً عملية جمال وشكل السيارة وإن كنت أنا أحترم رأي الناس كلهم بس عالأقل في نظري أنا السيارة جميلة جداً. الآن خلينا نتكلم عن الجمال مع العملانية؛ شوفوا عملية توزيع الهواء قدام تبريد أو توزيع عندنا باركينغ سينسرز مخفية بشكل حلو؛ الحساسات أمامية؛ شوفوا الكروم شفايف الكروم من تحت؛ تبريد الفرامل عندنا هنا شوفوا طالع مثلاً السينسر أسود وهناك أبيض يعني التفاصيل الحلوة مدمجين العملانية والسيفتي الأمان في الجمال مع إنسيابية مع عملية تبريد بشكل رائع؛ عندنا هنا طبعاً 47 كريستاله من شورفسكي يعني مشهور اسم شورفسكي غير الديرل إن لايت اللي هي الإضاءة النهارية طبعاً اللمبات اللي هي الذكية اللي تتحرك معانا في الملفات وفي كل شيء؛ إنسيابية السيارة عندنا الرادارات اللي فوق وطبعاً راح يبان في الجوانب السوداء هنا كمان يبان معانا الكاميرات الجانبية غير الكاميرات الخلفية.
طبعاً زي ما إحنا شايفين عندنا هنا الله يسلمكم بين هنا عندنا كاميرا أمامية كاميرة الأشعة تحت الحمراء رؤية ليلية وهنا أحياناً يحطوا وراهاا الرادار حقت الهيد أب كنترول؛ زي ما إحنا شايفين هذي الكاميرا برضوا جانبية في الناحيتين والمرايا حاطينها شوية لبرا عشان الصوت من جوا يكون شوية هادي جداً وعملية النحت حق الإنسيابية طالعوا تحت كيف ينزل ويعرض ويخش جوا ويطلع ثاني مرة من ورا من فوق الحزام كيف أنهم يخشوا والرفرف برضوا من فوق بينزل نزول لتحت بتملس تمليس بينزل لتحت ويعرض فبتخش جوا الكفرات عشان تعطي رساوة وثبات وفي نفس الوقت يحافظ على الإنسيابية والشكل الجمالي. السيارة زي ما إحنا شايفين من ورا جاي كمالة النحت ووالتمليس حق السيارة نازل من فوق ومن هنا حاطينها هذي شوية النسافات الصغيرة علشان المطر وإلا الطين يطلع للجنب, الرفارف عريضة علشان الإنسيابية, الحساسات الجانبية والخلفية علشان المناطق العمياء والرجوع لورا ولسى راح نتكلم عن الكاميرا الخلفية عملية شكل جمالي وتوزيع للهواء علشان الحار يطلع من ورا الفرامل؛ الشكمان ماشاء الله يعني صوت رائع ومن تحت حتى الدفيوزرز باينه معانا بالكامل من ورا؛ هنا عندنا الكاميرا الخلفية راح نشوف طبعاً صوت الشكمان طرب شوفوا بس الكاميرا الخلفية لما تعشّق عالريفرس شوفوا كيف تطلع وتستخبى ثاني مرة بشكل رائع جداً حتى اللمبات يعني كلها تصميم اللمبات من أجمل مايمكن؛ فيه في الشنطة نفسها فيه جناح منها وفيها بحيث أنه يرفع الهواء لفوق ويُثبت السيارة لتحت.
زي ما إحنا شايفين الفتحات السوداء اللي تحت هذي هذي من ضمن العملية الإنسيابية اللي تجي من تحت السيارة؛ السيارة تجي إنسيابية من فوق ومن تحت ومن الجوانب هذي عملية الإنسيابية علشان تشوفوا كيف مسطحه السيارة بالكامل من تحت وعملية كمان برضوا تطلع الهواء الحار اللي في الدفرنسات أو في عمود الكردان او في مناطق ثانية مبردات الزيت كلها تطلع الهواء عشان تبرد السيارة وتثبت.
طبعاً تكملة الإنسيابية من تحت لفوق ومن الجوانب مكمل الإيردفيوزر اللي هو موزع الهواء وزي ماقلت شايفين أنفاق علشان يوزع الهواء يخليه يطلع بخط مستقيم بسرعة بنفس السرعة اللي دخل فيها بدون مايبرم أو يتجمع تحت السيارة فبالشكل ذا يكمل في أقصى سرعة طالع فيها وبأقصى سرعة أنه مايقعد تحت السيارة علشان السيارة تكمل على سرعات عالية 250 مثلاً كيلو متر في الساعة وهي ثابتة ومستريحه دون مايأثر عليها الهواء.
طبعاً مفتاح المرسيدس حافظ زي ماهو على تقاليده المعتادة بس طبعاً السيارة والمفتاح بجيبك أنت يادوب تفك الباب تنفح معاك السيارة تشغل المكينة بالزر تشتغل معاك منت محتاج إنك تطلعه من جيبك أكثر من أنه بيستقبل وإرسال.
طبعاً وحده من الأشياء الحلوة برضوا ي السيارة دي لما تكون واقف ورا وبس تحط رجلك من تحت السيارة أكرمكم الله تمررها تفتح الشنطة معاك زي ما إحنا شايفين الآن شوفوا أهي أتفتحت علشان على طول الواحد يشيل الأشياء ويحطها؛ طبعاً الشنطة على قد ماهي داخله جوا ووسيعة حافة التحميل عالية شوية خلينا نكون صادقين يعني بالكبيرة راح تشيل لك كيسين مقاضي في سيارة زي دي مارح تحط لك شيء ثقيل وقاعد شغال تكد على السيارة أو أيش بتسوي فيها فيعني السيارة دي لها ناسها أو لها ميزانيتها وفي نفس الوقت فيها كل أنواع الدلع اللي ممكن تخطر على بالك.
طبعاً برضوا من ضمن المفتاح فيه عملية المفتاح اللي جوا هذا يسموه الفاليمود زي لما الواحد يوقف السيارة في مطعم في أي مكان ففي الدرج يحافظ على الأشياء مثلاً حاطط في محفظه أي شيء يقفله بالشكل ذا ويخلي المفتاح في جيبه ماحد يقدر يفتح الدرج الداخل اللي جوا السيارة.
طبعاً زي ما إحنا شايفين السيارة مفتوحة بالكامل معطيتك بحر من الإضاءة والرؤياء فعندك هنا البيبلر؛ البيبلر اللي هي عادة يجي هنا عامود ب ماهو موجود وفيه عامود ج اللي هو هنا في الآخر طبعاً علشان يعملوا الحكاية ذي صفحوا السيارة قووها من قدام من هنا ومن هناك علشان يلغي القائم اللي هنا حق الحماية وبيعطي كمان شكل إضاءة من أجمل ما يمكن.
طبعاً الحزام من أول ماتدخل السيارة الحزام بيطلع لك بالكامل بالكهراء فيه كمية بديهيات في السيارة دي بشكل الواحد ما يتوقعها بحيث لما يولف على السيارة هذي أو الفئة من السيارات هذي يخرب معاد يعرف لسيارات أقل من كذا.
سؤال بديهي..نقص الهواء في الكفرات هل يؤثر على زيادة صرفية البنزين؛ نعم أو لا؟
فجداً بديهي وجداً واضح جاوبونا إن شاء الله على السؤال وإن شاء الله تكسبوا معانا طقم كفرات. قلنا بسم الله يا هادي وهذي أولريدي 140 تحس الـ200 ماعندك مشكلة أبداً في السيارة ذي كنا ماشيين 200 كيلو ولا شيء أهي تعرف ليش أحترم السيارات الألمانية أقدرها يعني لازم أكون محايد في كل السيارات بس ما أقدر لما أشوف الفرامل حقت السيارات الألمانية برفع لها القبعة إحترماً مافيش كنا ماشيين 200 كيلو.
طبعاً إحنا الآن جوا المرسيدس الـ إس كوب 500 اللي هي إس كلاس البابين اللي كان اسمها سي إل؛ زي ماشرحنا لكم أبعاد السيارة عملاقة ماهي قليلة أبداً وكل اللي في السيارة السيارة حافظت على يعني خلينا كمان نشرح لكم هي المرسيدس أعلى مبيعاتها راح تكون طول عمرها من السي كلاس إذا تبغى أسرع سيارة في مرسيدس يعني أنا ركبت مرسيدس من سي كلاس بيجيبوا (10:9) العيش والزبدة حقهم والفلوس كلها من هناك. إذا تبغى أسرع سيارة في مرسيدس راح تروح على سي أس جي إم جي لكن الـ إس كلاس ماهي من وحده من أفخم السيارات وكل شيء وطريقة أنه شركة مرسيدس بتقول يا أخي تعال أنا أوريك كيف السيارات الفخمة تتعمل برُقي وكلاس وبتكنولوجي حلوة وبأفخم يعني أنا دائماً أعتبرها الـ إس كلاس كذا علامة الفخامة واستعراض علضلات مرسيدس حقت الفخامة والمفهوم حقت السيارات الراقية؛ وزي ماقلنا مفهوم منافسين السيارة هذي الله يسلمكم البنتلي كوب والبنتلي يمكن أقدم في حكاية في ناحية وحده اللي هي عملية تقدم السيارة بدفع رباعي في دي الفئة وعندنا الله يسلمكم يجي لها البنتلي تجي الروزريث وإن كانت الريث شاطحه شوية لفوق في السعر وبرضوا عندنا تجربة الريث؛ البنتلي عندي تجربة لها وإن كانت قديمة شوية الكوب لكن احاول أحدّث التجربة حقتها؛ وعندكم الله يسلمكم الفيراري الفيراري برضوا دخلت على الخط هذا إبتدأت من زمان بالـ 400 – 412 – 456 الجي تي أيه وبعدين سيارات الـ 612 سكليتي وحالياً سيارات الفيراري الـ أف اللي هي كبيرة تكفي 4 ركاب وفعلاً فيراري كمان والماكينة قدام وفيراري للمرة ذي نزلوا لها دفع رباعي فكانت شوية غريبة في الفئة هذي. طبعاً لو بنتكلم عن فخامة ونعومة هي نفس التجربة اللي إحنا جربناها في المرسيدس الإس كلاس الـ إس 500 اللي شفناها حقت الأخ أسامة هي نفس التجربة الله يسلمكم نفس السيارة بس على بابين وعلى كلاس وعلى رُقي جداً؛ وحده من الأشياء اللي أنا مذهلتني في السيارة ذي هذي الـ إس 500 وفيه الـ إس 36 وبعدين فيه الله يسلمكم الـ إس 36 الفورماتيك الـ إم جي؛ الغريب أن الـ إس 36 بالرغم من أنها أكبر الماكينة وأوسع وأثوى السيارة إلا أنها تجي أخف وزناً من هذي بحوالي 20 كيلو فالألمان ذول الأوروبيين لما بيحطوا حاجة في راسهم بيبدعوا فيها فراح نحط معاك راح نحط لكم جدول للأوزان والأحصنة والتسارع بينها وبين... طبعاً فيه الـ إس 56 الوحش الكبير الـ 12 سلندر لكنه راح تشوفوا إن شاء الله المعلومات الكاملة عندنا؛ طبعاً بس راح أريحكم في كلمة وحده المرسيدس طول عمري أركبها لازم تسيب لك 5% روز نور إزعاج طريق هذي من وحد من أهداء سيارات مرسيدس في حياتي اللي ركبتها من عزل الصوت إن كان الأربعة أبواب أو البابين. خلينا نتكلم عن حاجة بسيطة أشرح لكم العزم والأحصنة.. السيارة هذي 4400 سي سي 8 سلندر 455 حصان والعزم 700نيوتن متر ماشاء الله في عين العدو؛ إذا طلعنا على الـ 36 تصير 585حصان و 900 نيوتن مترح إذا طلعنا على الـ 56 -12 سلندر لأنه هذي 4700 سي سي 8سلندر 2 توربو الـ 36 – 5500 سي سي 8 سلندر 2 توربو طبعا ًطبيعي 4 صمامات في كل رأس سلندر 2-3 صمام وبعدين ندخل الله يسلمكم على 12 سلندر 4 صمامت برضوا في رأس كل سلندر و 6000 سي سي تون توربو؛ هذيك 130 حصان 1000 نيوتن متر والـ 36 900 نيوتن متر وهي 700 نيوتن متر.
علشان أشرح لكم أيش يعني نيوتن متر يا جماعة الخير أفكر فيه واحد كان أحب كنت أدرس برا فكان راجل حق دكتور وهندسه ميكانيكا ودائماً أحب أيش أجر شكله شوي لأنه غاوي سيارات فأسأله وأقعد أتكلم معاه أشياء كثير فمرة كنت بسأله عن التوربو العزم فالرجل مشهور لكن ماني فاكر اسمه فكان يقول لي كلمة وحده أقول له الأحصنة فالواحد لما كان صغير يكون شايف أن الأحصنة كل شيء وبعدين اتعلمت أن الأحصنة تتحسب ما تتقاس لكن اللي يتقاس العزم لأنه بيحسبها بالكيلو واط وبيحولها لحصان أو لجيس أودن أو ...... المهم ما أحوسكم في الحوسه ذي كلها؛ أنا أفتكرت كلمة كان حلوة مرة يقولها أيش يقول الراجل يقول لي: حسن الأحصنة اللي قد أيش راح تاخذ منك سرعة أو مسافة أو قد أيش بسرعة راح تلبس الجدر قلت له طيب قال لي العزم قد أيش راح تشيل الجدر دا معاك وتنتع الجدر دا وتشيله معاك بالطريق قلت له آها ينصر دين العزم دحين ركبت معايا وطبعاً أشرح للواد مرة والشباب الجماعة أصحابنا كلهم وضحكوا عليا قالوا طبعاً لازم تشيل الجدر أنت ماينفع تخلي الجدر مكانه فالـ 700 نيوتن متر صدقوني ماهي قليلة أبداً على سيارة 2 طن و 70 كيلو تشيلها من 0 إلى 100 في 4ثواني و2 من 10؛ 70 كيلو اللي هي أقل بـ 20 كيلو 36 هذا طبعاً الوزن المُعلن لما تجي السيارة فولي لوديد يعني مليانه مواصفات راح تجي أثقل الـ 2طن والـ70 كيلو الله يسلمكم من 36 إذا دفع رباعي 3 ثواني و 9 من عشرة من 0 إلى 100 إذا دفع خلفي 4 ثواني و 1 من عشرة فهذا بس يعني إذا الـ إس (15:8) راح تجي 4 ثواني و2 من عشرة راح نحط لكم الجدول فيها. طبعاً كل شيء عندنا موجود من الماوس المنطقة هنا كاملة زي ماشرحنا في الـ إس كلاس حقت أسامة؛ هذا زي الهيدروليك السيارة حتى ترتفع معانا من برا وتبان في الشاشة عندنا كلمة السيارة ترتفع؛ من هنا الله يسلمكم التحكم في المساعدات التعليق حق السيارة هل هو رياضي أو سبور؛ كذا سبور وكذا رياضي برضوا بيبان معانا في الشاشة؛ هنا التحكم هل هو السيارة سبور كمان أو إقتصادية في صرف البنزين راح نطع منها ثاني مرة. طبعاً النوع اللي بقولكم فيه بودي لما يجي يميل راح تلاقوا هنا زر في النص اسمه ABC اللي هو حق يحافظ السيارة تميل معانا وهذا يميل بس لما السيارة تكون كونفورت ومايميل لما تكون في المود الرياضي.
هذا عندنا مساعد التوجيه حقت الدركسون أنه السيارة تكون هنا خطين؛ عندنا هنا كمان المسار شغال كان اول مساعد حق الدركسون؛ عندنا الكاميرا 360 درجة اسمع عين الطير وعندنا هنا الرؤية الليلية يعني مثلاً خليكم دقيقة شوفوا الرؤية الليلية طبعاً في النهار ماهي واضحة وضحناها قبل كذا في الإس كلاس بس شوفوا.
طبعاً الدخول على قد ما أن السيارة كبيرة لكن خلينا أتكلم برضوا السيارة هذي من أوسع السيارات في الفئة هذي علشان أحدد على كلمة الفئة هذي شوفوا يعني أنا دخلت ويمكن الدخول مو دائما ً بيساعد شوية لأنه برضوا العارض هنا جاي المنطقة ذي رفعوا مسند اليد لشوية لقدام؛ وسعها لا بأس فيه ما اقدر أقول أنه مريح كثير لكنه لابأس فيه قاعد ورا حتى عميلة هنا طالعوا برغم الكاب لابسه وكل شيء فتحت السقف واصلة لهنا ومعطيك قروف معطيك يعني مكان أوسع من فوق علشان الواحد قاعد من دون ما يخبط راسه أنا لو هذي قاعد هنا راح أخبط راسي لكن هنا شوفوا كيف قاعد مستريح وطبعاً أصول القعدة هنا الواحد مايقعد كذا يريح شوية لورا كذا وينزل كذا ويسقط في السيارة ويستمتع بالجلد وأنواع الفخامة اللي في السيارة بالكامل والتكييف اللي ورا؛ برضوا يعني خلينا نكون واضحين برضوا مساحة لابأس فيها بس ماهي مرة وسيعة. دحين مسند الراس عفواً شوفوا مسند الراس ينزل والكرسي بيتحرك لقدام؛ طبعا ًالله يعين على الدخلة والخرجة.
طبعاً حاجة حلوة طالعوا هنا هذي الكرسي لازم يرجع لورا شايفين. فيه معلومة حلوة ومهمة في السيارة دي على قد ما حطوا عبقرية فيها شاصيه جديد, تكنولوجي اللي موجودة في الإس 500 في الإس كلاس عموماً, منزلين منها فئات رياضية بي إم جي بمختلف فئاتها كل أنواع التكنولوجي اللي تخطر على بال أحد موجودة هنا؛ أنواع التكنولوجي اللي راح تصير متوفرة خلال عشرة عشرين سنة في المستقبلية كلها موجودة من الآن بس فيه ميزة جداً حلوة حاطينها ماراح نتكلم عن العمق الزجاجي اللي شرحتلكم هيا قبل كذا في الإس كلاس لكن خلينا نتكلم عن حاجة إضافة حلوة حاطينها في السيارة دي تعرفوا دائماً حتى في التصوير أول كنت دائماً لما أجيب مصور معايا أنا أعمل وأصور أقول له يا أخي فيه خاصية القصور الذاتي راح تتعبك يعني لما أتسارع بيكون قدام أنت راح ترجع لورا بالكامل راح أفرمل أنت راح تروح قدام راح ألف يمين أنت راح تروح شمال وإذا رحت شمال أنت راح تروح يمين عكس الحركة هذا طبيعي فأيش عملت شركة مرسيدس هنا حاجة حلوة فيه تلاقوها ABC اللي هي حق البودي كيرفل أو التحكم في البودي كيرفل آكتف بودي كيرفل فاللي سووه الله يسلمكم كالآتي لما تجي أنت مائل داخل ملف مثلاً بالشكل دا لليمين فأنت أوتوماتيك إذا ماشي بسرعة عالية أنت واللي بجنبك بتتحرك جوا السيارة لليسار عكس الزاوية حقت الدخول فتقوم السيارة تميل معاك لغاية 2,65 تميل معاك باتجاه الملف لجوا فاللي بيصير أنت قاعد جوا السيارة فأنت بتميل مع السيارة لجوا للملف فكأنها جاية من السيارات الموتور بايكس وصراحة حركة عبقرية جداً مابتزود في السرعة أو في التماسك لأن السيارة أولريدي دفع رباعي لكنها بتريح الركاب جوا وتعطيهم شعور أحلى بدال ماهو طول ماهو جوا السيارة الحزام رابطه الكراسي لامته وفي نفس الوقت البودي بيتحرك يمين وشمال.
الآن ااا مشكلة السيارات هذي فيها عدة مشاكل أول خلينا آخذ السيارة كشكل؛ السيارة من أجمل مايمكن ومن أحلى مايمكن فيها كل أنواع الفخامة اللي تخطر على بال أحد وماتخطر على بال أحد؛ منافسينها زي ماقلت عندنا بنتلي وأغلى وعندنا الروز ريث وبعيدة في السعر بمسافة وعندنا الله يسلمكم الفيراري إف إف وبرضها كمان داخلة على فئات مثلاً الإس 56 في السعر أعتقد؛ البنتلي منافس قوي وجاية 8سلندر 505 أحصنة وهنا 455حصان عيب البنتلي الشكل الموجود حالياً بكل التحسينات اللي فيه عمره حوالي 11 سنة تقريباً لكن أعتقد لما ينزلوا في المستقبل ويغيروا مازال شكل السيارة حلو ولما ينزلوا عملاق الفوكس واجن مع العملاق حق اللي هو يملك البنتلي والعملاق اللي هو مرسيدس يعني مابيلعبوا مع الجماعة ذول آخذين اللعب هذي سيريس فجداً جديين وبيبدعوا في السيارات.
السعر إذا ابتدينا من 720 – 730,000 ريال إلى حوالي 800,000 ريال دخلت على فئات البنتلي 8 سلندر اللي هي دفع رباعي ويمكن أسرع من 0 إلى100 مثلاً أو في نفس الفئة ففيه هنا مرسيدس بتعطي فخامة كاملة مطلقة وتكنولوجي حلوة بس بنتلي بتصنف نفسها هي والروز روز أنها فئة أعلى وأفخم فيمكن حتى مرسيدس بنس على هذا السعر بكل الفخامة والتكنولوجي اللي فيها يعني صدقوني مافي شيء ناقص بس يمكن كان ممكن تخلي السيارة مبهرجة أو مزبرقة بشكل أفخم بحيث أنها لما تحط راسها برتس بنتلي أو الروز روز مو من قلة مقدرة مرسيدس لكن مرسيدس بيركزوا على العملانية والستايل تبعهم الرائع.
عيب السيارات ذي في رأيي الشخصي.. بعد كالواحد يجرب السيارة هذي ويستمتع فيها يعني يمكن يرجع بيته حفيان لأنه ماراح يرجع يركب سيارته الثانية فراح يرجع لبيته حفيان لأنه بصراحة بتحطك في جو مو موجود في أي سيارة ثانية بتخليك الناس تقولك أنا والله ما أدفع سعر في السيارة دي أنت راكب السيارة ومستمتع بكل شيء فيها بكل لحظة بكل ثانية جوا السيارة وتشوف السيارة كيف تتفاعل معاك وتتجاوب معاك وبتساعدك الناس اللي برا ماهي فاهمة أانت أيش بيصير معاك من جوا والاستمتاع اللي فيها.
ختاماً.. يعني أرجوا إن شاء الله تكون ناسبتكم التجربة السيارة من أجمل مايمكن عيبها بسيط سعرياً دخلت على فئات البنتلي اللي هي أعلى منها لا أكثر ولا أقل ومسألة أذواق في النهاية واتمنى تكونوا إن شاء الله استمتعتوا في السيارة زي ما استمتعنا إحنا فيها اليوم وشكراً لكم.
- يرجى تسجيل الدخول لإضافة تعليقات